Segun minister di Husticia, Andin Bikker, e echo cu e buskeda di e mucha perdi Roshandrick a wordo suspendi un rato y despues reactiva, no tin di haber cu discrepancia of diferencia di opinion entre institucionnan ya sea ministerio di Husticia y Ministerio Publico (OM).

E declaracion aki a tuma luga un par di ora prome e investigacion a conduci na e descubrimento di e curpa di e criatura aki dera den un buraco cu a wordo coba den un mondi na Savaneta.

Prome cu esaki minister di Husticia Adin Bikker a cualifica e caso aki como un tragedia nacional. E minister ta spera cu pa medio di e declaracion menciona ariba, e por a coregi of aclaria cualkier impresion afo cu lo tabatin diferencia di opinion den e departamentonan interno. “No ta asina!” Simplemente tabata un rato so cu a suspende e buskeda nacional pa bin cu un evaluacion a base di e proceso di protocol cu un caso asina di un buskeda nacional ta exigi, asina minister Bikker a informa.

E mandatario a agrega cu diadomingo ‘corectamente un rato a tuma e decision di suspende un rato pa base di e echo cu e señora mama a cuminsa duna cooperacion y duna cierto informacionnan’, a dicidi di reactiva e buskeda un par di ora despues. Tambe a incentiva e interogacion riba e sospechoso principal di e caso aki cu ta e padrastro di e dos criatura morto. Tur adresnan y areanan cu tabata conoci pa realisa e buskedanan di e mucha aki, tur a wordo bishita intensivamente.

Buskeda riba nivel di Natalee Holloway
E ta haya cu talbes hopi hende no ta realisa cu ora un buskeda nacional ta tuma luga ta algo masha excepcional debi cu e recurso masha limita cu nos tin ta wordo poni na disponibilidad pa realisa e trabou di buskeda aki. E ultimo di e nivel aki cu a tuma luga riba nos isla tabata relaciona cu e buskeda di e hoben Mericano Natalee Holloway na 2005. “Un buskeda nacional no ta primi un boton y bo ta pone tur hende riba pia.”

No mester lubida e mandatario a indica cu tin otro factornan relaciona cu e siguridad nacional di pais Aruba cu mester keda observa, specialmente den e area turistico, comercial y rond di nos pais. Mirando e demanda di personal y recurso cu un buskeda nacional ta rekeri, e ta wordo evalua cada 24 ora. E proceso aki ta cu a base di evaluacion, conseho di minister ta pidi cada biaha 24 ora di prolongacion pa e asistencia di Marina Real. E decision aki ta wordo tuma pa e team investigado conhuntamente cu Ministerio Publico y Marina Real.

Dialuna pa 3or ora cu e plaso aki tabata cabando, nan a bolbe haci un apelacion pa medio di gobernador di Aruba pa Marina Real di Reino Hulandes por sigui duna asistencia. Ayera pa 3or atardi tabata e fecha final di 24 ora a pa dicidi si nan mester sigui cu e buskeda a base di evaluacion pa 24 ora mas, pero prome cu esaki a sosode a drenta e informacion cu e criatura a wordo haya morto.