Minister di Husticia Andin Bikker tocante toque de queda: ‘Tur persona cu ta riba caya cu sin permiso, obviamente ta bira sospechoso’

Ayera mainta, minister di Husticia Andin Bikker a ofrece un conferencia di prensa pa e medionan local pa splica tocante toque de queda cu lo cuminsa awe desde 9or di anochi te mañan 6or di mainta, esaki lo keda implementa te 31 di maart.

Den e cuadro aki, el a trece dilanti cu e motibo cu nan a dicidi di implementa esaki ta cu nan a dicidi di haci un apelacion pa comunidad pa nan por coopera den e situacion cu henter mundo ta pasando na e momentonan aki y lamentablemente esey no a sucede. P’esey el a bisa cu ta yegando e ora di limita cierto libertad cu comunidad tin.

Tambe, el menciona cu loke nan kier ta trece siguridad y orden publico pa comunidad. Lo bay tin hopi polis riba caya den dianan aki, asina como motor unit y helicopter si ta necesario y Mobil Command Center y diferente proceduranan cu lo wordo observa.

E manera con nan a yega pa e decision aki, Bikker a comenta cu minister presidente ta esun cu ta lidera e kalamiteitverordening cu tin diferente actor como KPA, instancianan como bomberonan, cu ta reuni constantemente pa nan por yega na decisionnan den cuadro di e situacion aki.

E toque de queda lo funciona desde 9or di anochi te 6or di mainta, cu un prohibicion pa hende ta riba caya. Den e cuadro ey lo tin cierto excepcionnan pa KPA, personanan cu ta encarga cu orden publico y esun cu ta encarga di siguridad nacional.

“Solamente lo tin excepcion pa hende cu ta traha cu boticanan, Web, Elmar, Setar, APA, ANSA, asina como tambe ministernan, e personanan aki mester tin un badge, carchi of permiso pa nan por ta riba caya den dianan aki”, Bikker a sigura.

Tambe el a menciona cu diferente funcionarionan semper mester tin su badge of un tipo di declaracion cu nan tin permiso.

El a splica cu segun e desaroyonan lo ta bayendo y team operacional ta traha, nan lo evalua di dia pa dia con e excepcionnan aki lo funciona; tur esaki ta depende di con pueblo ta reacciona.

Bikker a expresa cu ta importante aclaria cu na ningun momento nan tin e intencion di limita e libertad di ciudadanonan. Sinembargo, door di e calamidad sin precedente den henter mundo ta pone cu nan mester tuma e pasonan aki, cu no ta pa molestia ningun persona, pero tabata necesario pa trece trankilidad y limita e posibilidad mas hende contagia cu e virus.

Cuerpo policial lo tin hopi patruya riba caya, pa monitor e toque de queda aki. Na final tur persona cu ta riba caya cu no tin un permiso, obviamente ta bira sospechoso, pa motibo cu lo tin menos trafico riba caya y hende lo no mester ta ambulante riba caya.

E obhetivo ta pa e personanan cu mester bay trabou tuma e destino mas corto pa yega na e destinacion di trabou. Por ehempel esunnan cu ta traha den un instancia cu ta draai continuamente y cu ta un excepcion, e intencion no ta pa cana riba caya den oranan di anochi.