Ayera atardi, Andin Bikker, minister di Husticia y lider di partido POR a ofrece un conferencia di prensa pa duna di conoce su banda di medaya relaciona cu locual diabierna ultimo a sucede na parlamento cu minister di Infrastructura, Desaroyo Teritorial y Medio Ambiente, Marisol Lopez-Tromp.

Bikker a lamenta cu minister Lopez-Tromp den reunion publico kier touch cu cierto temanan pa asina mancha su integridad, algo cu e ta haya ‘hopi lamentabel’.

Den parlamento, Lopez-Tromp a señala cu Bikker a haya un contract sin destaho publico, pa loke Bikker a splica cu e articulo 26 di ley di contabilidad ta duna un oportunidad pa por desvia di un destaho publico y atende casonan di urgencia. Ora ta trata di proyectonan pa salvaguardia siguridad nacional, e Aanbestedingsverordening no ta aplicabel riba nan.

Den e caso aki ta trata di un proyecto urgente di Guarda Nos Costa (GNC) cu desde basta tempo caba ta confronta cu e situacion di personanan di nacionalidad Venezolano cu no tin status legal na Aruba y cu algun di nan a pidi regreso boluntario, como tambe algun cu a pidi asilo. E situacion aki a causa un problema grandi pa via cu e localidad di GNC ta limita y no tin caminda pa atende e personanan aki, mirando cu te ainda no a logra un acuerdo cu Venezuela pa por deporta nan, segun Bikker a sigura.

“Pa bay un destaho publico e ta dura pa minimo di 6 pa 8 luna”, y segun loke el a bisa no por warda asina largo. Te hasta nan a haya conseho di GNC mes. Ademas el a comenta cu e no por traha contract, sino cu esey a wordo traha door di departamento huridico di su bureau. “Ami no ta sinta cu contratista, esey no ta mi tarea.”

Den parlamento, tambe minister Lopez-Tromp a “medio insinua” cu ex-minister Otmar Oduber tabata trahando den bureau di Bikker, pa loke el a menciona cu e mes no tin contacto cu Oduber. Eel a entrega su carta pa directiva di partido basta tempo caba, ‘e no ta consehero di mi bureau y no ta consehero di mi’.

Tocante loke e parlamentario Alan Howell a bisa den reunion publico, cu ‘si minister Lopez-Tromp no ta baha, gobierno ta bay cas’, Bikker a declara cu el a papia cu Howell y loke el a splica ta e proceso y no un condicion. E palabranan ‘a wordo mal interpreta’.

Ademas, tambe a comenta tocante e documento firma pa 7 minister contra minister Lopez-Tromp, e cual supuestamente ta bisa cu nan lo no traha cune mas. Bikker a expresa cu ta un documento caminda 7 minister ta bay di acuerdo pa reduci su cartera na solamente e fast track y efectivamente esey ta e documento cu 7 minister aki a firma, Bikker a comenta.

Bikker a expresa durante un conferencia di prensa algun dia pasa cu si minister Lopez-Tromp ta minister ainda, e no lo atende un reunion di ministeraad mas. Pa cu esaki tambe el sigura cu parlamento, cu ta hefe di nan, mester reflexiona. Minister presidente ta bay hiba un combersacion cu Lopez-Tromp. “Henter e proceso aki desde cu Lopez-Tromp a bira minister tin hopi tension y ami como persona cu tabata e lider interino mester keda intermedia. Pero mi tin lunanan cu esaki ta rekeri hopi energia pa mi y den e proceso aki, tur hende mester duna un espacio, asina como mi lo duna pa mi mes tambe.”

“Si minister presidente ta invita mi pa sinta na mesa cune, ami ta habri pa esey”, Bikker a sigura.

Di loke ta trata e factura cu a leak den rednan social, di un miembro di partido POR cu tin un compania di siguridad cu ta traha pa Serlimar, Bon Dia Aruba a puntra minister Bikker si e como lider di partido ta wak cu esaki ta etico. El a contesta cu loke el a compronde ta cu esaki ta un compania di famia y cu ta un contract cu gobierno anterior, cu e no a profundisa su mes den e tema aki. E compania en cuestion ta di e casa di e persona menciona, y e no ta wak un problema den esey.

Pero segun por a mira den rednan social, varios di e contract aki tin fecha di 31 di januari, 29 di februari y 31 di maart aña 2020.