Minister di Husticia Andin Bikker tocante personanan cu a pidi asilo: ‘Lo ta miho pa nan cuminsa busca un manera pa regresa’

Minister di Husticia, Andin Bikker a ofrece un conferencia di prensa ayera tardi, den cual el a trece dilanti cu gobierno ta zorg pa personanan cu a pidi asilo, cu no tin e medionan financiero pa por regresa nan pais. Asina tambe organisacionnan internacional ta dunando asistencia humanitario pa e hendenan aki na e momentonan aki.

Bikker a splica cu nan a haci un analisis di e hende cu a bin for di 2018 cu a pidi asilo y nan a determina diferente aspecto. Un di nan ta cu personanan cu ta pidi asilo ta personanan cu hopi biaha a bin Aruba, pa motibo cu nan tin un familiar of un amigo riba e isla. Tambe hopi di nan ta residencia cerca di su hende conoci y ningun di nan ta cana su so riba caya.

“Mas di 90% di e casonan cu nos ta tratando y evaluando ta personanan cu ta pidi asilo pa motibo economico, nan no ta persigui politicamente”, Bikker a sigura.

A base di esaki, a cuminsa desde dos siman pasa pa anuncia cu si e unico motibo cu no por regresa nan pais ta cu no tin motibo financiero, of no tin vuelonan disponibel, ta organisando vuelonan y si ta constata cu e persona no tin e medio financiero pa cumpra un ticket, nan lo percura e ora ey pa e persona bandona e isla cu e condicion cu e no ta bonbini mas pa un tempo.

Di esaki, el a menciona cu nan a haya varios persona cu a reacciona positivamente riba esaki. Tambe tin hende cu a pidi asilo, pero si ta mas bien pa aspecto economico, ta permiti pa retracta nan peticion di asilo, e ora ey nan por regresa na nan pais normalmente.

A base di e maneho nobo aki, Bikker a comenta cu loke e ta trece dilanti ta pa invita e personanan aki pa regresa nan pais. Esun cu tabata pensa cu por haya un speransa di un trabou cu un bonansa economico, ‘na e momentonan aki e circunstancia a cambia y lo ta miho pa nan cuminsa busca un manera pa regresa’, el a manifesta.

“E grupo di personanan cu ta pidiendo asilo ta birando menos” y esunnan cu ta akinan y cu ta bou di e capa di asilo, ta pensando cu riba e situacion y bou e maneho nobo, gobierno por zorg pa nan bay bek den e caso cu nan no tin e medio financiero of no tin vuelonan disponibel.

Di loke ta trata e asistencia pa esunnan cu ta riba e isla, Bikker a remarca cu tin bon contacto cu organisacionnan internacional manera Agencia pa Refugiado di Nacionnan Uni (UNHCR), Organisacion Internacional pa Migracion (IOM), Caritas, entro otro cu ta dunando asistencia pa e hendenan aki, pa nan no keda desampara for di punto di bista humanitario.