Minister di Husticia Andin Bikker tocante minister Marisol Lopez-Tromp: ‘Si bo no tin sosten di parlamento bo tin cu tuma retiro’

Ayera mainta, minister di Husticia y lider di partido POR, Andin Bikker a ofrece un conferencia di prensa tocante e situacion cu aworaki ta existi den gobierno pa loke ta trata e decision cu su partido a tuma di retira confiansa den minister Marisol Lopez-Tromp.

Bikker a informa cu e no lo bay participa mas den reunion di Conseho di Minister tanten cu Lopez-Tromp sigui como minister. El a duna como motibo cu nan como coalicion a encamina un proceso di mediacion cu Lopez-Tromp y e no a duna mucho di su banda y varios biaha el a cancela afspraak cu nan. “Un minister mester di sosten parlamentario y e mester busca tambe. Ora bo ta den un proceso di mediacion, e ta bin di dos banda”, el a sigura.

Sinembargo, segun loke el a trece dilanti, e parlamentarionan no ta haya oido di Lopez-Tromp ni ta contesta ora nan ta yam’e. Parlamento ta hefe di gobierno y a encamina e proceso di reestablece e confiansa cu nan a pone riba Lopez-Tromp, algo cu el a declara cu no a tuma luga.

Tambe Bikker a comenta cu Lopez-Tromp varios biaha a atenta contra su persona y contra e parlamentarionan den prensa. “Esaki no ta di buena fe di su banda”, el a afirma.

Aparte di e decisionnan cu segun Bikker, Lopez-Tromp a tuma, di e cual e no ta di acuerdo, Bikker a sigura cu e ultimo simannan aki manera tur hende sa, nan tin un mandato di spearfishing desde parlamento na aña 2005. Segun el a bisa, e tempo ey tur fraccion di parlamento a bay Saba a base di e propuesta cu tin aden pa reglamenta e topico aki. Esaki tin un mandato electoral, e ta para den diferente propuesta di e partidonan y nan a tuma e decision riba un maneho deriva di manehonan similar di Hulanda.

Di esaki, Bikker a expresa cu nan a bay consulta tambe cu Ministerio Publico y el a afirma cu nan a haya un positive advies riba esaki. Y nan a presenta un decreto caminda cu nan ta bay introduci un sistema di registracion, cu e ora ey e persona por haya un vergunning.

Na aña 2017, minister Bikker a publica un nota riba su pagina di Facebook cu e titulo: ‘Decreto di 12 di mei ta un mocion di desconfiansa di Mike Eman contra Paul Croes. No ta posibel suspende of traspasa ministerio’.

Un parti di e texto aki ta bisa lo siguiente: “Den nos Constitucion no a crea e posibilidad pa por tin un minister sin cartera. Compara articulo 44, inciso 2, di Constitucion di Hulanda cual ta bisa: “Ook kunnen ministers worden benoemd die niet belast zijn met de leiding van een ministerie.” Nos Constitucion sinembargo no conoce un articulo asina. Pues segun nos Constitucion y e Landsverordening instelling ministeries, ni “tijdelijke ontheffing”, ni traspaso di cartera completo di un minister pa otro, caminda esun cu perde su cartera ta keda como minister sin cartera, no ta posibel, ya cu esey ta rekeri un cambio di nos Constitucion y/of di Landsverordening instelling ministeries, cual ta rekeri un Ordenansa y pues consulta legislativo cu Parlamento.”

Tocante esaki, Bon Dia Aruba a puntra minister Bikker kico ta e diferencia den tempo di ex-minister Paul Croes cu aworaki di minister Lopez-Tromp. El a contesta cu e tempo ey a kita henter ministerio for di dje y a haci un minister sin portefeuille. Den caso aki, minister Lopez-Tromp a retene cierto tareanan, loke ta nifica cu e no ta completamente un minister sin portefeuille. Y na final di dia esey ta un fase di transicion cu aworaki ta den parlamento pa expresa nan mes riba e desaroyo, y cu e ta bay warda ki decision ta sali for di esaki.

Ademas, tambe a puntra cua ta e argumento legal pa sigui paga minister Lopez-Tromp sin cu e tin e cartera. Bikker a señala cu te ainda e tin cierto tareanan specifico cu ta para den decision di ministeraad y cu e lo por sigui cu e proyecto di Fast Track di ministerio di Infrastructura, manera el a bin atendiendo den lunanan aki. “Su cartera a wordo reduci”, el a sigura.

Di loke ta trata ken ta e responsabel pa e kiebro ley cu Bon Dia Aruba a puntra Bikker, el a menciona cu esaki no ta pa un kiebro di ley. “Den mi concepto, e no ta bin consulta su manehonan cu ta regarda cu diferente ministerio. P’esey nos tin ministeraad pa papia di maneho y tuma decisionnan”, el a declara.

Di mesun manera, el a trece dilanti cu den caso aki, dos parlamentario di e mesun partido no tin confiansa den Lopez-Tromp pa e mesun motibo di tuma decisionnan sin consulta cu nan. Ley constitucional ta bisa cu na e momento ey, e minister tin cu tuma honor na su mes y tin cu retira, segun loke el a sigura.

“Mi no sa ken ta conseh’e, pero si bo no tin sosten di parlamento bo tin cu tuma retiro, pasobra parlamentario por bira independiente, pero no ta existi e concepto di minister independiente”, Bikker a manifesta.

Pa finalisa, el a resalta cu e motibonan pa pidi e retiro di Lopez-Tromp ta “cu e no ta duna di su banda y e ta keda ataca nos, ataca otro ministernan, no ta consulta cu ministeraad tocante maneho. Mester existi un union”.