Den henter mundo semper a existi noticianan falso, pero cu internet y tecnologia nobo di comunicacion y informacion, Fake News a aumenta y asina e divulgacion di noticianan falso a bin pa provoca un circulo di desinformacion peligroso.
Diahuebs ultimo, minister di Husticia Andin Bikker a informa e comunidad cu Gobierno ta tumando nota cu diferente paisnan, entre nan Alemania y tambe algun cerca di Aruba, ta evaluando pa cambia nan codigo penal pa tuma pasonan huridico contra Fake News y esey por bira castigabel.
Bikker a splica cu el a pidi un conseho urgente pa e presidente di e comision cu a traha riba e Codigo Penal. Y na e momentonan aki, nan ta trahando riba Codigo di Procedemento Penal den cual minister a bay Parlamento pa duna un splicacion riba kico ta bay ta e cambionan den esaki.
Asina mes, el a sigura cu a ricibi diferente yamada di e comunidad cu ta frustra pa via di Fake News y su efectonan, cu por toca e fundamentonan di estado di derecho. El a duna como por ehempel cu siman pasa, pa via di un Fake News a plama un noticia cu Colegio Arubano lo a pidi mayornan pa bay busca nan yiunan na scol, pa motibo cu tabatin un tiramento na e scol. Di esaki, Bikker a bisa cu no tabata berdad y a causa hopi conmocion.
Tambe el a declara cu ta existi ‘Deep Fake News’ cu ta ora hende ta haci un manipulacion di un declaracion cu un software, y esey tambe por crea panico innecesario.
Di tur e fenomenonan aki, Bikker a anuncia cu den diferente pais cu tin sistema huridico comparabel cu esun di Aruba, ta evaluando proyectonan di ley y amienda pa nan adresa e fenomeno aki, cu no tin un luga den estado di derecho.
“No ta tolerabel ora un persona ta bin cu Fake News pa causa daño of panico den comunidad”, el a bisa.
Na mesun momento, el a aclaria cu nan ta monitor con ta bezig cu un tipo di amienda, ki tipo di propuestanan di ley ta bin cune. Pa e motibo aki el a pidi conseho pa e comision, riba con nan por introduci den sistema huridico un penalisacion pa hendenan cu ta traha Fake News, cu na final di dia ta un tipo di falsificacion, segun minister mes a expresa.
“Den un bon sociedad caminda cu tin e responsabilidad comparti pa trece noticia veridico di interes dilanti, no ta pas ora un persona ta bin y ta crea panico y inventa historia cu e meta di spanta e comunidad y hasta causa daño”, el a finalisa.
