E ciudadano di Parkietenbos cu aña pasa a gana su caso contra pais Aruba pa opera e incinerator nobo sin permiso pa molester (hindervergunning) a entrega un peticion pa documentonan (LOB) na minister di husticia, pidiendo e conseho di DWJZ pa otorga un permiso pa molester (of no) y e permiso mes y bao ki condicionnan. Den ultimo reaccion minister Andin Bikker (POR) a indica cu a duna permiso bao condicionnan.

E asunto di incinerator ta uno cu ya Bon Dia a yega di toca riba varios ocasion. Tocante e posibilidad cu gobierno a habri pa su mes pa test e incinerator pa 8 ora cada dia den siman, sin tin permiso pa esaki, e caso cu e ciudadano a cuminsa, y tambe e proceso dudoso y poco transparente di destaho pa e incinerator, como tanto e rapportnan cu ta indica cu tin candela spontaneo na dump.

Di 21 di juli pa 20 di augustus di 2020, pues aña pasa, personanan cu tabatin obhecion contra e instalacion di e incinerator na Parkietenbos por a entrega nan obhecion contra esaki pa asina laga nan bos wordo scucha.

Esaki mientras cu den articulo 1, inciso 1 di e Hinderverordening ta indica cu ningun establecimiento cu causa daño, molester of peliger por wordo lanta, sea pa via di holo, huma, vapor, of zonido duro sin permiso di e minister encarga cu husticia. Banda di esaki, inciso 2 ta indica cu pa haci cambionan na un establecimento asin’aki, cambia esaki di luga, of expand’e, tambe mester un permiso.

Pues rasonablemente lo por yega na e conclusion cu e echo cu ya a pone e incinerator na Parkietenbos, ta ilegal riba su mes, mirando cu e ley ta explicitamente menciona cu haci cambio, move of expande un instalacion cu lo por causa molester no por sin permiso.

E mesun ciudadano cu a (parcialmente) haya rason den su caso, a entrega un obhecion (bezwaar) contra e instalacion di e incinerator riba 18 di augustus. E ciudadano a menciona den su peticion di LOB cu e minister a declara riba e dia ey cu e lo invita habitantenan pa e minister por tende nan opinion riba e asunto aki, prome cu yega na dicidi pa duna e permiso (of no).

Desde e momento ey no a tende mucho mas di e procedura pa yega na e permiso pa molester, te cu riba 27 di januari Alan Howell, presidente di comision Infrastructura y Medio Ambiente di Parlamento di Aruba, lo cuminsa opera den maart.

Pa e rason ey e ciudadano a dicidi di entrega un peticion di LOB, pidiendo concretamente lo siguiente: Consehonan y rapportnan relaciona cu e otorgamento di e permiso pa molester pa e incinerator na Parkietenbos, un splicacion dicon no a cumpli cu e exigencia di articulo 6 di e Hinderverordening, rason dicon no a tene un hoorzitting cu e habitantenan, un copia di e permiso y condicionnan, y otro documentonan relevante pa bin na e decision di otorga un permiso pa molester.

Despues di a skirbi e reportahe aki, informacion nobo a drenta di minister di husticia despues cu Bon Dia Aruba a haci preguntanan tocante e permiso, den cual minister Andin Bikker (POR) a reacciona bisando: “conforme advies obteni di diferente instancia di Gobierno y cu consideracion di e condicionnan stipula den sentencia di Corte, a otorga un permiso pa operacion bao condicionnan estricto entre cual e condicionnan stipula pa Corte. Por lo demas por tuma contacto cu e instancianan concerni.”