Despues di e incidentenan den fin di siman, diadomingo mainta Minister di Husticia, Seguridad y Integracion, mr. Andin Bikker, a yama un reunion extraordinario di e cinco partnernan strategico den maneho di Husticia y Seguridad. Meta di e reunion ta pa haya informacion actualisa di e sucesonan y pa amplia e medidanan anuncia diabierna ultimo. Tur esaki den un esfuerso pa contraresta e tendencia criminal y mal comportacion di un grupo den comunidad.
E partnernan den e “Vijfhoekoverleg” ta Cuerpo Policial Aruba, Veiligheidsdienst Aruba, Ministerio Publico Aruba, Nationaal Centraal bureau Terrorismebestrijding, Veiligheid en Interpol (NCTVI), y Ministerio di Husticia mes. Regularmente e grupo aki ta reuni den cuadro di un maneho uniforma den Husticia.
Durante e reunion diadomingo mainta a acorda cu lo amplia e medidanan cu a anuncia diabierna mainta, pa garantisa seguridad, segun un comunicado di prensa di gobierno demisionario. Ya diabierna mainta a anuncia entre otro mas control severo y visibilidad di polis riba caya y via e helicopter, cual den fin di siman a tuma luga y varios otro medida cu ta implementando.
Pa loke ta e ampliacion di e medidanan, por spera cortamento den orario di ciere pa establecimentonan considera ‘hotspots’ y combatimento y prevencion den cooperacion multidisciplinario cu diferente instancia y Ministerio. Tambe lo intensiva e implementacion di tecnologia, entre otro ‘mobile scanners’ pa arma y instala camaranan moderno na entre otro e ‘hotspots’.
Mirando e desaroyonan y e urgencia pa tuma medida mesora, a tuma contacto cu e Presidente di e Comision fiho di Husticia di Parlamento pa un reunion extraordinario cu Parlamento dialuna mainta. Ey lo suministra informacion actualisa di e susedidonan y e medidanan adicional cu polis y Vijfhoek ta conseha. Minister Andin Bikker tambe lo boga pa Parlamento por pre-aproba cu fondonan adicional lo wordo aloca den presupuesto pa mas ekipo pa Husticia, pa por ehempel ekiponan moderno, cu awendia por haci e trabou di prevencion mas efectivo, manera e scanners pa detecta arma di candela den auto y camaranan moderno na entre otro e ‘hotspots’.
Pa loke ta e casonan mes, den cual un of mas sospechoso a pasa los tiro cu arma di candela cerca di un luga nocturno considera como “hotspots”, ainda no por divulga mucho pasobra investigacion ta andando keto bay.
