Dialuna pasa, Minister di Husticia Andin Bikker a ofrece un conferencia di prensa pa e medionan local na unda el a laga conoci un decreto den cual lo keda prohibi e permanencia di cachonan den area di high rise.
E decreto ministerial lo ta pa atende e problematica di molester pa turistanan den area di high rise, cu cachonan di parti di un of mas persona cu ta cana cu nan cacho riba beach y algun di nan ta ofrece e bestianan na turista. Bikker a anuncia cu nan a haci un estudio profundo riba e alternativanan cu leynan existente.
El a splica cu tin dos instrumento. E prome ta instrumento huridico penal, den cual tin diferente articulo di Codigo Penal. Pero den esey nan tambe tin e ley ordenansa riba cacho, cu den un di su articulo ta regarda y duna y posibilidad pa por decreta pa cierto area di e pais na unda e cachonan no tin mag di yega. E area lo wordo delinea cu borchinan.
Den dianan aki, lo decreta cu e concepto cu ‘for di area di hotel Divi Phoenix te cu Ritz Carlton lo ta keda prohibi pa cacho’. Pero den esaki tambe lo tin excepcion, por ehempel, si un turista biaha cu su mascota e decreto no ta afecta esaki. Si tin persona cu mester di un cacho pa guia, e decreto aki tampoco lo afecta nan, si hotel kier haci algun evento, nan por haya un ontheffing y bisiñanan cu ta biba cerca di area aki tambe lo por pidi un ontheffing.
Bikker a menciona cu loke kier logra ta elimina hende cu ta causa molestia pa turistanan y ofrece pa nan cumpra cacho. Ademas nan ta pidi donacion pa duna cuminda pa e cachonan y esey ta algo innecesario. Aparte nan tin esey den Codigo Penal.
Violacion di e decreto aki lo por trece como consecuencia un multa of confiscacion di e cacho.
