Minister di Husticia, Andin Bikker a ofrece un declaracion tocante siguridad ayera mainta, durante cual el a expresa cu diabierna ultimo, el a splica den Parlamento cu a base di cifranan, nan a haya un indice halto di criminalidad na aña 2016 y 2017.
Tocante esaki, el a bisa cu na 2016 tabatin e cantidad di 65 atraco. Na 2017 Ministerio Publico a emiti un reporte anual di 111 atraco. Tempo cu e gobierno actual a asumi su cargo, e cantidad di atraco a reduci na un total di 34 na 2018 y 46 na aña 2019. Tocante e aña aki, Bikker a splica cu e ultimo dianan, nan a ilustra cu esey ta a base di sospechosonan di personanan cu a bin di afo, specificamente di Venezuela.
Asina mes, Bikker a comenta cu den cifranan ta demostra cu nan a reduci e cantidad di atraco y ‘esey ta un hecho’. Tambe el a menciona cu nan ta keda cu e reto y nan ta atendiendo esey door di un maneho hopi estricto pa loke ta trata admision y expulsion di personanan indocumenta. Ademas el a afirma cu nan a bin cu un plan integral cu mas polis riba caya y maneho di Husticia a trece un resultado visibel.
“De vez en cuando algo lo por pasa, esey ta semper e bataya”, Bikker a manifesta y a finalisa agregando cu e siguridad a wordo restaura.
