Minister di Husticia Andin Bikker a presenta diferente plan tocante siguridad

Durante un conferencia di prensa cu minister di Husticia, Andin Bikker a ofrece diahuebs ultimo, el a trece dilanti algun pasonan cu ministerio ta tumando tocante e area di siguridad relaciona cu e diferente atraconan cu a tuma luga den ultimo dianan.

Bikker a expresa cu nan a publica un Request for Expression of Interest (REOI) pa camaranan mas sofistica y adicional riba e cayanan na centro di Oranjestad, desde Welcome Plaza te cu Cas di Gobernador, loke ta pertenece pa un prome fase.

Nan ta reactivando diferente di e camaranan, pa motibo cu desde 2016 door di proyectonan di infrastructura como Watty Vos Boulevard y tambe Green Coredor, algun di e camaranan cu tabata poni riba e verkeerslicht no ta funciona. Lo reemplasa esakinan mirando cu structura a cambia. Tambe el a anuncia cu lo tin mas REOI pa nan por haci uzo di tecnologia pa monitor miho.

Ademas Bikker a comenta cu a cuminsa cu un ciclo de reunion cu diferente stakeholder, manera Stichting Middelbaar Onderwijs Aruba (SMOA), Stichting Katholiek Onderwijs Aruba (SKOA), Dienst Publieke Scholen (DPS) y representantenan di maestronan, caminda a cuminsa enfoca riba aspecto di siguridad na scol.

Un di e metanan di esaki, Bikker a splica cu ta pa tur scol tin alarma di siguridad, pero tambe di candela y asina por evita e caso lamentabel cu a sosode siman pasa den scol Macuarima. Tocante esaki el a menciona cu si scol tabatin un sistema di alarma y siguridad, por a evita e incidente ey.

Tambe el a bisa cu lo implementa un Plan Nacional pa loke ta trata siguridad na scol.

Bikker a expresa cu e siman aki a reuni cu AHATA riba siguridad hotelero, pa wak di ki forma por trece siguridad conhuntamente cu stakeholder y di nan parti nan a invita un compania internacional.

Bikker tambe a sigura cu pa otro siman lo reuni cu doñonan di supermercado, kiosco di Lotto como tambe diferente sector.

Di mesun manera, el a trece dilanti un programa pa certifica companianan di siguridad, pa motibo cu kier intensiva e cooperacion cu sector priva pa e meta comun, cu ta siguridad den henter isla.