Ayera mainta, minister di Husticia, Seguridad y Integracion, Andin Bikker a duna un conferencia di prensa pa trece dilanti dos topico cu tin di haci cu e creacion di un industria nobo pa promove Aruba door di retonan di pandemia Covid-19, y tambe criminalidad cibernetico crusando frontera, algo cu a bin tumando luga recientemente.

E mandatario a duna di conoce e ampliacion di maneho pa loke ta trata promocion di un tipo di industria nobo pa Aruba, den cuadro di e retonan cu Covid-19 a trece, pa asina bin cu “un dimension nobo pa nos economia,” segun loke Bikker a sigura.

Algun tempo atras a introduci loke ta yama ‘Workation y Digital Nomad.’ Esaki ta dirigi pa personanan cu ta bin di Merca pa nan pasa un temporada na Aruba trahando, pero basa riba internet.

Na e momentonan aki tin otro dimension, cu Bikker a afirma cu nan ta studiando conhuntamente cu ATA y otro stakeholders, na unda lo kier promove Aruba pa bira un Incubator Valley. Esaki ta nifica cu por atrae personanan di Merca cu ta prometedor, pero tambe localnan cu tin bon ideanan pa loke ta trata empresanan cibernetico, pero cu no tin capital of no tin e sosten adicional cu nan mester, y gobierno lo sostene nan.

“Bo ta provee tur loke nan mester pa nan por yega y crece como industria grandi, esey ta e concepto di Incubator”, el a afirma.

Bikker a conta cu nan a pensa riba esaki pa motibo cu Aruba ta bayendo den direccion di un debe nacional door di pandemia Covid-19 y esey ta acumula mensualmente. Ta p’esey cu nan mester a pensa riba otro tipo di industria, pa asina por surpasa e reto aki y zorg pa Aruba por cuminsa haya entrada.

Den concepto, esaki lo desaroya bao maneho di admision cu personanan di Merca ta bin pa establece nan mes aki, cual aworaki ta den fase di comienso, y aki por duna e sosten pa nan compania por florece.

Den proximo simannan, Bikker a comenta, nan hunto cu stakeholders y CEO pa tur e proyectonan di digitalisacion di Gobierno lo bay traha riba e tema aki, pa nan por haci un presentacion mas amplio di ki manera esaki lo tuma luga.

Tambe,el a bisa cu el a combersa un par di siman atras cu e consul di Merca estableci na Corsou, na unda a base di tratado di amistad nan ta di acuerdo pa duna un sosten pa Aruba te unda cu por.

Igualmente, el a menciona cu e concepto aki a haya un bon acogida cu e diferente stakeholders y lo bay presenta esaki completamente, pero a haya e concepto riba su mes positivo, “pasobra e ta make sense cu ta un version nobo, digital, di loke den pasado a tuma luga cu Dutch Code. Y pa via di esey Aruba a haya como 200 miyon florin a base di un inversion hopi minimo.”

E industria aki ta rekeri relativamente poco inversion y ta cosnan cu nos tin caba, manera cambernan di hotel, espacio y internet, Bikker a bisa.

Crimen cibernetico
 Otro Bikker a trece dilanti ta trata di crimen cibernetico, na unda den ultimo tempo, segun el a sigura, a confronta hopi persona riba rednan social, por ehemplo Facebook, cu ta bin cu acusacionnan absurdo of ta haci yamado pa violencia.

Di esaki, Bikker a conta cu siman pasa, un persona estableci na Hulanda a haci un yamado pa violencia, pa bay cende candela. Igualmente, Bikker a wordo confronta pa un persona cu a wordo deporta pa Santo Domingo y cu a presenta acusacionnan falso contra su persona. Den e caso aki e persona tambe ta estableci pafo di Aruba.

Bikker a anuncia cu desde 2018 a institui un departamento cu tin como obhetivo combati di criminalidad cibernetico y cu tin e dimension di Interpol, e polis internacional, y cu seguramente lo duna un declaracion pa e cadena hudicial internacional pa asina nan por hala atencion di e persona aki.

Ta p’esey cu nan ta trece e maneho aki, cu segun Bikker a declara, ta surpasando frontera, na unda hende cu no ta biba na Aruba, riba rednan social ta expresa acusacionnan falso. Y mester atende esaki pa pone un pauta.

Den leynan local esaki tambe ta keda aplicabel, Bikker a expresa. Igualmente, el a splica cu si tin un persona cu ta ofende o ta purba falsamente di daña e nomber di un persona cu ta biba na Aruba, e caso por ta mas facil, pa motibo cu por atende cune directamente. Pero ora e ta crusa frontera tin cu atende e caso di un otro manera.

Ya caba nan ta bin aplicando esaki, manera a sucede cu Truddy Hassel den pasado, na unda el a wordo menasa for di Venezuela tambe via rednan social. Den e caso aki, di mesun manera Interpol a tuma contacto cu e Interpol estableci na Venezuela pa asina duna siguimento na e tipo di menasa aki. “Y esey ta e enfasis cu nos ta bay duna riba dje cu e maneho cu nos ta bay implementa”, el a expresa.

Bikker a reuni cu e departamento concerni pa wak kico ta e posibilidadnan y parti importante ta, manera e mes a señala, duna un señal “cu nos no ta tolera e tipo di cosnan aki”.