Diaranson merdia, minister di Husticia y Asuntonan Social, Sr. Rocco Tjon a reuni cu SMAC, KPA, CMO como tambe lidernan di grupo di carnaval, den cuadro di e sucedido di diasabra ultimo durante fakkel optocht. Un reunion sumamente positivo caminda a dialoga entre tur stakeholders.
Loke a bin padilanti durante e reunion aki ta, cu for di november diferente reunionnan a tuma luga, diferente draaiboek a wordo comparti cu tur stakeholder. Den e draaiboek tur hende a wordo informa cu e controlnan lo tuma luga pa loke ta papelnan di auto, trekker y mas. Segun e mandatario, no obstante tur esaki, e motibo principal di e reunion tawata importante pa planifica y yega na palabracionnan concreto cu otro pa loke ta e luna nos dilanti, pa asina evita loke a sosode fakkel optocht.
Banda di esaki, diferente punto a wordo treci padilanti door di SMAC, KPA, CMO pero tambe door di e lidernan di grupo cu tur stakeholder lo tene cuenta cune pa por garantisa un bon balans, pa percura cu tur hende por gosa di carnaval na un manera sano, pero di otro banda tambe cu nos por garantisa siguridad pa tur hende; mirones, participantenan, e bandanan y pa esnan cu ta traha entre otro KPA, Ambulans y mas.
Di parti e gruponan di carnaval a haya un bon reaccion, caminda a indica di ta compronde e reglanan y tambe ta di acuerdo cu e reglanan aki, sinembargo pa loke ta e parti di comunicacion si lo mester bin un mehoracion di tur banda.
Por ultimo, minister Tjon, a enfatisa riba e hecho cu tin camaranan di siguridad instala riba e rutanan di carnaval, cual ta den funcion, y lo bay wordo monitorea henter e temporada aki, pa asina asisti Cuerpo Policial mas eficiente y eficaz. Ademas, a traha palabracionnan cu Ministerio Publico pa bin cu listramento preventivo y ta bay percura tambe pa personal adicional pa e temporada aki, pa banda di garantisa siguridad pa participantenan, bandanan, mirones y tur esnan trahando, lo bay garantisa siguridad na nos costanan tambe.
