Minister di Husticia y Asuntonan Social, Sr. Rocco Tjon, hunto cu Gobernador di Aruba, Sr. Alfonso Boekhoudt, a haya un recorido amplio di nos Instituto Coreccional di Aruba, pa por wak e diferente inversionnan cu a wordo haci recientemente.
Prome cu e recorido a haya un presentacion amplio di e desaroyonan actual. Esunnan mas remarcabel ta cu dentro di poco lo bay traha cu personal fiho na e “jeugd afdeling” y tambe lo inicia cu e proyecto di cuido forensico. Lo bay brinda mucho mas actividad na nos hobennan, esaki debi cu tin un “assesment” a wordo haci bao di tur e detenidonan y di e forma aki sa cua cursonan y opleidingen tin nan preferencia. Di e forma aki lo duna miho contenido na reintegracion y resocialisacion.
Un departamento cu recientemente a haya hopi atencion y inversion ta esun medico. Di e forma aki por cumpli cu rekisitonan y alabes mantene gastonan abao, door di brinda e cuido necesario. Tin diferente inversionnan infrastructural tambe tumando luga, pero e plan a largo plaso ta pa yega na un instituto nobo.
Miembronan di management team a duna un presentacion amplio di e avancenan pa yega na e “projectdossier” aki, cual Hulanda ta asistiendo nos cune. Un bishita hopi positivo y tin mucho mas inversionnan na caminda pa personal, proyectonan y infrastructural.
