Recientemente durante un conferencia di prensa, Minister di Husticia y Asunto Social, Rocco Tjon, hunto cu Korpschef di Cuerpo Policial di Aruba, Ramon Arnhem a anuncia e adkisicion di vehiculonan nobo pa Cuerpo Policial.

“Mi ta hopi contento pasobra awe nos lo ricibi autonan sumamente bunita pa nos disponibilidad,” Korpschef Arnhem a expresa. Algo hopi importante pa Cuerpo Policial, el a remarca, pasobra desde su yegada, el menciona, el a indica cu ta importante pa e base di e organisacion ta den ordo.

“Hende, recurso y material mester ta den ordo. Pa e seguridad di mi hendenan, pero tambe seguridad di nos comunidad pa asina nos por garantisa seguridad ariba e manera corecto, pa hende y pa e comunidad,” el a subraya.

Arnhem a splica cu e autonan nobo tin e medio- y posibilidadnan tecnologico mas avansa y ariba e manera aki a agentenan policial por percura pa e seguridad di e pueblo.

El a enfatisa cu Ministerio di Husticia ta encarga pa e bon cooperacion den den mayoria di e casonan aki y di e manera aki e organisacionnan ta traha pa desaroyo.

E Korpschef a indica cu e desaroyo nan ta wak e den e hende y e recursonan y tambe den e cursonan cu e agentenan ta ricibi. El a agrega cu Cuerpo Policial ta den proceso pa haya uniform nobo y e proporcion di recursonan tecnologico, manera portafoon. “Di esey e ta trata. Cu nos por laga wak den e practica y no solamente cu palabra, cu nos ta haci un diferencia y cu nos ta den movecion y desaroyo,” el a remarca.

“Mi ta hopi contento y un biaha mas masha danki na tur mi coleganan cu a realisa e proyecto aki y cu a traha hopi duro pa nos a yega aki. Tambe na nos sindicato cu ariba un manera corecto semper a keda critico y efectivo y cu tambe a traha den conhunto cu nos pa asina zorg cu nos a scoge e vehiculonan corecto,” el a finalisa.

Minister di Husticia y Asunto Social, Rocco Tjon, a indica cu manera ta conoci conforme e plan di maneho di Ministerio di Husticia, e enfoke semper ta pa inverti den e organisacionnan y den e personal. Pa e motibo ey, el a remarca, ta importante pa hiba un maneho financiero responsable pasobra a base di e maneho financiero tur e tipo di proyectonan aki ta bira un realidad.

Minister Tjon a repasa tambe algun proyecto cu a wordo realisa pa eleva seguridad pa e propio agentenan policial.

El a indica cu preocupacionnan cu tabata biba cerca agentenan policial ta entre otro pa nan por tin e materialnan adecuado pa nan por eherce nan trabao y pa e motibo ey, Minister Tjon a señala, e proyecto di ICT a wordo ehecuta, un proyecto cu un costo di riba un miyon florin.

Banda di esey, el a menciona tambe e bulletproof vestnan cu a wordo adkiri pa tur e personal di Cuerpo Policial, radar y camaranan tambe cu a wordo busca pa e agentenan policial por traha mas sigur.

El a agrega tambe e proyecto di portafoon, menciona pa Korpschef Arnhme tambe, cu tabata algo cu tabata hopi importante pa Cuerpo Policial.

“Esey ta trece nos awe na e momento aki caminda despues cu un comision a haci tur su trabao, un comision cu ta consisti di Cuerpo Policial y Ministerio di Husticia, pero tambe tur e agentenan policial cu a percura pa haci e testnan necesario pa asina por a yega na e escogencia adecuado,” el a resalta.

Minister Tjon a enfatisa cu un total di 60 vehiculo a wordo adkiri pa Cuerpo Policial di Aruba. El a splica cu 34 di e vehiculonan na Yrausquin & Sons. E vehiculonan aki ta pa Surveillance dienst, Grenspolitie y Verkeersdienst.

E otro 26 vehiculonan a ser adkiri na un otro car dealership, cual ta vehiculonan special pa Departamento di Recherche.

“Pa e proyecto aki a tene cuenta cu tur departamento pa asina nan por dispone di e materialnan nobo. Di nos banda un danki grandi na sindicato di polis, na cuerpo policial y na tur e trahadonan di nos ministerio cu a haci esaki posible,” el a subraya.

Ademas di e proyecto di adkisicion di e vehiculonan, Minister Tjon a agrega cu como proyecto adicional tur e vehiculonan adkiri na Yrausquin & Sons ta bay wordo ekipa cu e mobile data terminal, un tecnologia cu ta sumamente importante pa e agentenan policial por haci nan trabao na un manera mas eficiente, pero na mesun momento tambe na un manera mas sigur pa nan propio seguridad.

Representante di Yrausquin & Sons a a splica cu e proceso di e proyecto aki a cuminsa algun luna atras na unda mayoria car dealerships na Aruba a wordo acerca pa participa den un destaho pa e vehiculonan nobo pa Cuerpo Policial di Aruba. E dealership a entrega su oferta y a haci test drive cu e diferente modelonan di auto y durante e test drive e autonan a destaca y asina nan a logra gana e destaho pa e 34 vehiculonan.