Diabierna ultimo, minister di Finanzas y Cultura, Xiomara Maduro a anuncia cu for di januari 2023 tin un cambio fiscal y en conexion cu esaki, tin un implementacion di un plan di impuesto pa otro aña.

Un comision conforma primeramente pa Departamento di Impuesto for di dos aña pasa, na caminda a conoce algun cambio grandi manera BTW, cu tabatin e intencion pa cuminsa cune na januari di 2023, pero a aplasa esaki debi na inflacion cu na e momentonan aki ta aumentando na tur parti di mundo, loke ta trece cune hopi inseguridad.

“E cambionan ta cu nos ta bay over na locual ta bira un plan di impuesto 2023, unda cu prome nos a papia di un reforma fiscal cu lo mester tabatin un cambio grandi cu introduccion di un sistema nobo di belasting indirecto pa reemplasa BBO, aworaki nos mester para un rato cu esey y na su luga ta bin un plan di impuesto 2023 cu lo ta vigente desde 1 di januari di 2023”, Maduro a señala.

E meta di e Plan di Impuesto 2023, segun e mandatario a informa, ta pa Aruba yega na “un sistema cu ta simpel y husto”. Esaki ta e lema cu nan a traha riba e cambionan necesario cu ta pa e recuperacion di Aruba su finanzas publico por medio di compensacion, reparticion husto y mehoracion di cumplimento di impuesto di tur ciudadano y bishitante.

Aña 2019 tabata un excelente aña pa Aruba, pero na 2020 mundo henter a confronta cu un pandemia cu a afecta e isla grandemente. E aña aki turismo ta bin recuperando, unda cu pa otro aña nan ta espera cu GDP tambe por mira e recuperacion den esaki y despues ta bin e recuperacion di finanzas publico.

Tocante esaki, Maduro a splica cu tin un otro componente, esta cu Aruba a presta placa for di Hulanda cu condicionnan cu ta inclui tin varios afspraak traha pa landspakket. Pero tambe unda tambe tin discusionnan di e supervision financiero cu Aruba tin awor y cu ta demanda pa por corta gasto den presupuesto. Tambe mester aumenta entrada pa asina ey por sigui bay dilanti.

Ademas, minister Maduro a señala cu di otro banda tur hende sa cu nan a cuminsa cu reformanan fiscal desde 2019 caba. Nan a haci cambio pa haci e sistema mas simpel y mas husto, manera el a sigura.

Compensacion ta necesario pa motibo cu tin un situacion di inflacion y esey ta algo cu nan mester tene na cuenta cune. Esaki ta importante di manera individual ,pero tambe pa negoshinan, y den esaki e reparticion di entrada cu pais Aruba ta haya for di turismo. “Esaki mester e ora ey ta un reparticion mas husto. Tambe e mehoracion di cumplimento di impuesto pa e ciudadano, pero tambe pa esnan cu ta bishita nos”, el a bisa.

Di mesun manera, Maduro a informa cu ta bay introduci un tarifa nobo di BBO cu ta resulta den un tarifa combina di BBO, BAVP y BAZV di 7%, hunto cu un pakete di compensacion pa mitiga e inflacion.

Tambe ta bay tin un reparticion husto di entrada y un aumento di cumplimento di impuesto (Compliance).

E tarifa nobo di BBO ta bay aumenta cu un 1% y ta bira 2.5% dia 1 di januari di otro aña, BAVP ta keda 1.5% y BAZV ta keda cu 3%, esaki ta duna un total di 7%.

“Ta bon pa indica cu e plan di impuesto 2023 ta acopla tambe na e cuadro financiero presenta den presupuesto 2023”, minister Maduro a comenta.

E recuperacion ta bin tambe den pakete di compensacion individual y tambe pa negoshi. Den e pakete individual ta bay baha tur categoria di impuesto riba entrada cu 2%; ta aumenta e suma liber di impuesto (belastingvrije voet) na 30.000 florin pa aña; ta separa cobransa di impuesto riba entrada di pension di behes di SVb; ta subi reparatietoeslag pa tur pensionado di SVb cu 45 florin pa luna; y no lo cobra impuesto di entrada riba tur tips.

Esaki ta trece cune un dato hopi importante, segun minister Maduro a expresa, cu den e parti di impuesto riba entrada di 2%, tin 60% di e forsa laboral di Aruba ta gana menos cu 2.500 florin pa luna. Esaki ta e motibonan pakico no ta bin cu BTW di un solo tarifa, “pasobra si bo haci esey, e grupo aki lo keda grandemente perhudica.”

Pa haya mas informacion tocante e cambionan riba impuesto, por subi riba e website di Departamento di Impuesto, ta bay tin un calculacion den cual hende por hinca nan entrada fiscal cu e intencion cu un grupo grandi ta bay paga menos impuesto debi cu tur e tarifanan a baha.

Un otro parti importante cu minister Maduro a trece dilanti, ta e separacion di cobransa di impuesto riba entrada di pension di behes di SVb. Den esaki el a referi cu un pareha casa unda nan dos tin pension di behes di SVb, por ehemplo, si e hende homber tin un pension extra, normalmente ta conta henter e entrada – esun di dje y di su casa. Den e cambionan cu ta introduci ta separa e impuesto aki, e suma ta reduci pa hende grandi no paga hopi impuesto.

Pa locual ta trata e pakete di compensacion pa negoshi, ta bay baha e tarifa general di winstbelasting di 25% pa 22%; ta mantene deduccion di inversion (investeringsaftek); ta introduci un deduccion maximo riba gastonan di devaluacion (afschrijvingskosten) di propiedad inmobil,; ta elimina e posibilidad di forma un pension den propio maneho (pension in eigen beheer); y ta elimina tarifa reduci di IPC (Imputation Payment Company).

Di loke ta trata e parti di reparticion husto y aumento di cumplimento, minister Maduro a anuncia cu ta aumenta tasa di impuesto di toeristenheffing di 9.5% pa 12.5%; ta reparti entrada total di toeristenheffing entre ATA (57%), pais Aruba (40.8%) y TPEF (2.2%). Ta bay mehora cumplimento di impuesto di acomodacionnan alternativo, por ehemplo, Airbnb. Ta bay cobra impuesto riba traspaso di propiedad economico inmobil (economische eigendomoverdracht); ta bay cobra impuesto riba traspaso di accionnan di entidadnan cu propiedad inmobil na Aruba (aandelenoverdracht); ta bay introduci un salario minimo pa tur director cu ta accionista den nan mesun empresa di 50% di nan volumen di benta te cu un maximo di 10.000 florin pa aña; y ta bay cobra impuesto di entrada riba prestamo excesivo di cada director cu ta accionista den nan mesun empresa.

Pa finalisa, minister Maduro a enfatisa cu e cambionan a wordo haci pa motibo cu “hunto nos tur ta paga menos”.