Minister di Finanzas y Cultura di Aruba recientemente a duna un discurso na ocasion di encuentro di Genootschap Nederland Aruba riba Herdenkingsjaar Slavernijverleden dia 11 di november 2023 na Den Haag. Durante su discurso, el a critica e actitud di Hulanda den e negociacion pa refinanciamento di e prestamonan di tempo di pandemia di coronavirus.

Maduro a cuminsa recordando cu dia 19 di december, Hulanda a duna disculpa pa pasado di sclavitud. El a destaca e comentarionan di prome minister Evelyn Wever-Croes e tempo ey, den cual el a bisa cu disculpa bon intenciona semper ta bon bini. Pero el a bisa cu su palabranan ta insinua e necesidad di sinceridad y reconocemento den e proceso di reconciliacion.

“Mi mester bisa cu a pesa cu di banda di Hulanda a pidi disculpa, na Aruba ta reina incertidumbre tocante e sinceridad cu cual a duna esaki,” Maduro a bisa. “E incertidumbre aki ta keda reforsa pa e presion politico y economico cu Hulanda ta eherce riba Aruba.” El a bisa cu den esaki e ta referi na e manera con e paisnan den Reino – Aruba, Corsou y Sint Maarten – a ser tata durante e negociacionnan pa refinanciamento di e debenan di Covid, indicando cu “ta necesario pa auto-reflexiona.”

Suficiente supervision financiero?

Referiendo na un punto cu prome minister a yega di expresa caba, el a menciona cu na momento cu Corsou y Sint Maarten a ricibi estado di pais dentro di Reino na 2010, nan a ricibi cancelacion di 70% di nan debe y cu esaki a instala un organo di supervision financiero a traves di un ley di Reino. “Hulanda ta probechando awo di e crisis di corona pa exigi pa Aruba tambe bay di acuerdo cu un ley di Reino pa supervision financiero, pero sin cancelacion di debe,” el a agrega. Maduro a bisa cu e unico beneficio lo ta cu lo haya un porcentahe di interes mas abao. Segun Maduro, ta di compronde cu Parlamento di Aruba a haya esaki inaceptable pasobra no solamente ta trapa riba nan autonomia, sino cu tampoco ta necesario pasobra ya tin suficiente supervision financiero na Aruba desde 2015.

Sinembargo, e asunto si tin suficiente supervision financiero na Aruba na cuestionable. Manera Parlamentario di Accion21, Miguel Mansur a expresa na juli ultimo: “E obstaculo riba e caminda aki ta Parlamento di Aruba, cu ta kere cu e Landsverordening pa supervision financiero ta suficiente pa cumpli cu e tarea di supervision. Sinembargo, Hulanda no ta di acuerdo pasobra den caso di un ley local, Hulanda no lo tin nada di bisa.” Sinembargo, el a splica cu “e landsverordening no ta traha. Na 2022 Parlamento a aproba un presupuesto cu un deficit original di 227 miyon den violacion di e landsverordening. CAft a recomenda un aanwijzing y Parlamento mester a cambia e presupuesto. Evelyn Wever-Croes mes tabata kier traha un rijkswet tempo e tabata den oposicion na 2014.”

Ademas, Mansur ta di opinion cu “tin mas cu suficiente evidencia cu Parlamento no por carga su responsabilidad di controla gobierno y sigura finanzas publico sostenibel durante hopi aña, dus e rijkswet ta un siguransa cu pueblo su placa ta wordo bon maneha. Politicamente MEP tin miedo di pasa e rijkswet, pasobra AVP lo ataca nan como entreguista etc., dus pueblo ta perde. E politica entre MEP-AVP ta tuma precedencia riba interes nacional,” el a finalisa.

 

Actitud colonial: un forma nobo di sclavitud?

Despues, Maduro a pasa pa critica e actitud di Hulanda. El a recorda cu a rekeri pa Aruba firma un acuerdo di refinanciamento pa e prestamonan di Covid prome cu dia 10 di october ultimo, pa cual tabatin dos opcion: “bay di acuerdo cu e ley di reino pa supervision financiero (RAft) door di cual nos lo ricibi un porcentahe di interes di 3,4%, of si no bay di acuerdo cu e ley di reino, un interes di 6.9%, cual en realidad ta un ganashi pa Hulanda di 3.5%.”

Maduro a bisa cu hasta tabatin un variante den cual explicitamente a exclui cu e negociacionnan por relaciona na un eliminacion parcial of completo. Den opinion di Maduro, “e posicion fuerte di [Departamento di Relacionnan di Reino] pa refinanciamento den contexto di un crisis global serio ta pone e holoshi di Reino back 160 aña, tempo cu e Colonianan ainda mester a produci ganashi.” El a destaca cu, cu e debe actual, Hulanda lo gana den henter e 20 aña di repago di e prestamo mas cu 300 miyon florin. Segun Maduro, no mester anda asina den Reino, principalmente mirando cu Statuut den Articulo 36 ta bisa cu e partidonan mester yuda otro.

“Lo tabata miho si Hulanda tabatin mas comprension pa e paisnan Caribense den Reino. E negociacion y e imposicion di loke nos ta yama “tarifa di castigo” en realidad ta refleha un actitud colonial, y ta de hecho un forma nobo di sclavitud,” segun Maduro.

Sinembargo, Hulanda ya a laga bon cla kico ta su motibonan pa insisti riba un ley di Reino na lugar di un landsverordening di Aruba. Y tambe ta tene cuenta cu e situacion financiero di Aruba ya tabata precario prome cu e pandemia – un situacion laga atras pa gobiernonan anterior, sigur, pero un situacion cu pa Hulanda ta nifica riesgo den nan propio finanzas. Considera por ehemplo cu Hulanda mester a haci amienda den su propio presupuesto e aña aki pa tene cuenta cu Aruba no lo paga e prestamo di Covid back e aña aki, y cu e placa cu a fia ta e placa di e pagado di belasting Hulandes.

Ta stop cu actividadnan di Aña di Conmemoracion di Pasado di Sclavitud

“Ta parce cu Hulanda despues di 160 aña no a haci suficiente auto-reflexion ni a siña di e pasado colonial y di sclavitud, loke pa nos ta un decepcion enorme,” Maduro a bisa. “En todo caso pa nos tabata hopi dificil loke nos a experimenta, e trato cu a ricibi, pero tambe cantidad di reto pa haya e medionan pa organisa tur esaki pa e aña di conmemoracion di sclavitud. Esaki ta trece nos na e punto unda nos mester bisa cu nos, na nivel di ministerio, ta stop cu actividadnan di conmemoracion di pasado di sclavitud.”

Maduro a indica cu a haci e escogencia aki den luz di e desaroyonan recien y ta refleha riba nan punto di bista inicial, cu mester ricibi e disculpa como sincero. El a bisa cu maske ta bay sigui e desaroyonan rond di e tema aki, nan no ta bay participa activamente den e agenda di conmemoracion di pasado di sclavitud.

No ta conoci ainda ki impacto esaki lo tin pa e cantidad di proyecto cu ya tabata den preparacion pa e actividadnan di e Aña di Conmemoracion di Pasado di Sclavitud, si ta bay cancela esakinan completamente of ta bay realisa algun actividad mas independientemente.

Consecuencia riba negociacion

Mirando e palabranan fuerte y antagonista cu Maduro a manda den direccion di Ministerio di Relacionnan di Reino, Bon Dia Aruba a puntra prome minister, Evelyn Wever-Croes si esaki lo por tin algun consecuencia riba e negociacionnan actual cu e ta hibando cu Secretario di Estado pa relacionnan di Reino, Alexandra van Huffelen.

Manera Bon Dia Aruba a publica recientemente, Conseho di Minister di Reino (Rijksministerraad, RMR) durante nan reunion diabierna no a duna aprobacion na e plan di gobierno di Aruba, presenta pa prome minister Evelyn Wever-Croes, pa amiendanan den ley di supervision financiero. Na lugar di aproba e propuesta di gobierno di Aruba, RMR duna mandato na Secretario di Estado, Alexandra van Huffelen pa asina e por negocia den nomber di RMR sin cu mester warda te e siguiente reunion di Conseho di Minister di Reino.

Sinembargo, te ciere di e edicion aki, no a ricibi contesta di Wever-Croes.