Durante e debate publico den Parlamento di Aruba pa trata e Segundo Cambio di Presupuesto 2024, Minister demisionario di Finanzas y Cultura, Xiomara Maduro (MEP) a splica cu den e cambionan proponi tambe tin fondonan aloca na bienestar di cultura na Aruba.
Renobacion Cas di Cultura
Aki e mandatario ta referi na un suma di 4 miyon florin cu ta destina como un subsidio special pa Cas di Cultura por realisa e trabounan di renobacion cu ta necesario. Cas di Cultura ta un tarima unico den nos region cu ta conta cu mas di 65 aña. Dentro di poco Cas di Cultura lo wordo renoba pa asina e por ta miho ekipa pa sirbi como centro cultural pa e Pueblo di Aruba.
Extra subsidio pa FMA
Fundacion Museonan Arubiano FMA tin na su encargo Museo di Antiguedad na Fort Zoutman, Museo Industrial na Watertoren San Nicolas y Carnival Euforia na San Nicolas. FMA ta ricibi extra subsidio di 188 mil florin pa asina por sigura su operacion optimal durante e proceso di recuperacion a causa di tabata cera durante y despues di e pandemia.
Fondo pa sigui cu Museo Betico Croes
Un museo dedica na e memoria y legado di Betico Croes, ta locual Gobierno di Aruba desde aña 2007 a inicia cu compra e tempo eynan di e cas di e mayornan di Betico Croes cu e intencion di transforma esaki den un museo na honor di e politico y estadista Arubiano cu a logra e Status Aparte pa Aruba den Reino Hulandes. Un fundacion a wordo lanta e tempo eynan cu representacion di Minister di Cultura pa garantisa e continuidad di e proyecto cu awor den colaboracion cu Ministerio di Enseñansa tin na su encargo pa caba di realisa e proyecto aki cu ta di balor significativo pa e memoria y historia di Pais Aruba. E suma concerni ta di 300 mil florin.
