Dos siman pasa Parlamento di Aruba a trata y a aproba e Presupuesto pa aña 2024 na unda cu durante su tratamento hopi parlamentario tabata puntra si awo cu Aruba ta recupera, ki dia pueblo tambe por ripara y sinti e recuperacion eynan den nan cartera.

Minister di Finanzas Xiomara Maduro a splica cu e recuperacion di e economia y finanzas di Aruba despues di e pandemia ta sosode den un ciclo di recuperacion cu ta consisti di cuater fase cu ta duna nan propio señal na pueblo.

Pa por duna alivio, prome tin cu fortifica e finanzas publico di Aruba, ya cu esey ta e paso den e ciclo di recuperacion di Aruba cu ta bin prome cu por brinda alivio na pueblo.

Prome señal: turismo creciente
 E mandatario a splica cu e prome señal di recuperacion por mira den cifra di turismo, por mira tur noticia di minister di Turismo, ATA, AHATA y AAA cu ta indica cu turismo ta creciendo y hunto cune e REVPAR ta bira mas halto y yegada di turista cu ta kibra record na aeropuerto.

Di dos señal: crecemento economico
 Den su splicacion na parlamento, minister Maduro a indica cu e di dos señal di recuperacion na Aruba ta bin di crecemento economico, pronosticonan di Departamento Economico, Banco Central y Fondo Monetario Internacional IMF ta mustra un crecemento economico basa riba dos digits esta un crecemento economico mas halto cu 10% di nos GDP pa Aruba den aña 2023. Esaki tabata di spera ya cu turismo ta e motor di Aruba su economia, y si turismo ta bay bon, esaki ta lora economia di pais.

Di tres señal: mehoracion finanzas publico
 Minister Maduro a sigui splica cu e di tres señal di recuperacion, ta bira visibel ora e finanzas publico di Aruba cuminsa mehora debi cu turismo ta creciente, economia ta stabilisa y gobierno ta aplica disciplina presupuestario. Aruba pa hopi tempo a conoce deficitnan grandi den presupuesto pa cual a traha debe grandi pa por yena e buraco aki den nos finanzas publico. Na fin di aña 2017 a trece un cambio den e maneho di finanzas publico na Aruba y a pesar cu e pandemia a trece cune un reto mas grandi financieramente, manera gobierno ta sigura, nan a tene su mes na un disciplina presupuestario cu awe a produci surplus den presupuestonan 2023 y 2024 di pais Aruba.

E di cuater señal: brinda alivio structural
 Na momento cu como pais ta fortifica e finanzas publico, por bay over na brinda alivio na pueblo, minister Maduro a splica parlamento cu locual ta haciendo na e momentonan aki ta pa fortifica e finanzas publico na Aruba pa asina por traha un fundeshi pa por brinda alivio na pueblo na un forma structural. E mandatario a splica cu pa hopi tempo na Aruba tabata tin e situacion na unda di un manera ad hoc ta brinda alivio. Tin biaha djis cu e meta pa gana eleccion y no pa duna un alivio permanente.

E minister a splica cu desde aña 2019, gobierno ta haciendo cambionan fiscal den cual ta percura pa por trece alivio na pueblo den un forma structural y no ad hoc.

“Mehoracion den finanzas publico, traha cu surplus den presupuesto, ta locual ta bay brinda espacio fiscal pa asina por duna pueblo alivio na un forma structural den aña 2025.”

Ademas, a mandatario a remarca cu durante e reunionnan publico pa trata presupuesto varios parlamentario, di parti di oposicion , a trece pa dilanti e hecho cu tin surplus como un critica of algo negativo, pero el a indica cu esaki ta algo positivo, sobre todo si imagina kico lo ta pasando si ainda presupuesto di pais Aruba lo tabata den deficit.

Durante e tratamento di e presupuesto a bin pa dilanti e punto cu pueblo mes no a mira, no a sinti ainda e impacto di e recuperacion economico cu gobierno ta referi na dje. Minister Maduro ta indica cu na tur pais cu tin recuperacion economico, incluyendo Aruba, e recuperacion aki tin cu cana su ciclo.

Dianan atras, prome minister a trece pa dilanti cu “Aruba ta recupera, pero e recuperacion ey no a yega tur caminda cu e mester ta y p’esey despues di esaki, y mirando e ciclo di recuperacion, mester por sa cu e recuperacion aki tambe awor ta na e momento cu e tin cu bay yega cerca e pueblo,” el a subraya.

E mandatario a splica cu solamente ora cu tin surplus den presupuesto tin espacio fiscal pa gobierno por duna pueblo back, manera cu ta ser sugeri. Tambe a remarca cu si gobierno no percura pa surplus, e no por tin e placa pa duna back na pueblo.

El a enfatisa cu cualkier alivio fiscal ta costa placa y cualkier servicio extra ta costa placa.

El a agrega tambe cu Aruba ta bezig cu reformanan cu tin den e landspakket pa gobierno por ta mas fuerte y resiliente. E reformanan aki tambe ta costa placa,manera el a sigura.