Den un entrevista pa Bon Dia Aruba, Minister di Finanzas y Cultura Sra. Xiomara Maduro ta splica con e proceso di presupuesto 2022 ta bayendo, con e plan di reforma cu COHO ta bay supervisa lo marca 2022 y e siguiente añanan, y tambe ta splica con e ta prepara pa goberna e siguiente añanan cu Gabinete Wever-Croes II.

Segun Maduro ta splica, e presupuesto 2022 a wordo presenta caba na e ministernan prome cu huramentacion a tuma luga. Desde otro siman Maduro lo sinta individualmente cu cada minister pa asina pasa ariba e presupuestonan individual y despues presupuesto 2022 lo cuminsa cana su caminda.

E ta splica cu despues cu conseho di minister tuma su decision riba e presupuesto, e ta cuminsa cana e caminda cu e tin cu bay pa e por haya su consehonan di Caft, Raad van Advies y asina bin back pa gobierno trata e consehonan aki, pa asina e presupuesto por bay den direccion parlamento.

“Teniendo na cuenta e tempo cu esaki ta tuma, sigur pa e parti di e consehonan cu tin cu bin y pa gobierno ora di atende cu esey, mi ta premira cu e presupuesto lo yega sea december, of mas sigur januari na locual ta parlamento pa asina e por wordo trata”, Maduro a bisa.

Plannan pa 2022 y e siguiente añanan lo ta marca pa e plan di reforma cu COHO lo supervisa y un di puntonan mas importante, pa locual ta e parti financiero, ta e reforma fiscal. Maduro ta indica cu desde gobierno ya caba tabata trahando riba un reforma fiscal caminda ta suavisa loonbelasting y inkomstenbelasting. “Nos a cuminsa caba cu cambionan for di prome cu tabatin e pandemia, prome cu COHO cu tur esey, ya caba nos tabata trahando ariba un reforma fiscal, 1 di januari 2019”, el a bisa. “Pero lamentablemente 2020 a bin y aworaki, despues cu e condicionnan di Hulanda, pa cu entre otro landspakket pero tambe e COHO, bo ta wak cu den dje tin un parti cu ta sigui ariba e reforma fiscal cu ta bira necesario.”

Un di e puntonan cu tabatin den e reforma fiscal tabata e parti di BBO, si lo bay over na un otro sistema, den e cuadro aki e sistema di BTW. Y segun Maduro ta splica ya a haci e calculacionnan y a presenta esakinan tambe na e Conseho di Minister nobo, y aworaki ainda ta pendiente e decision di con ta bay tin cu introduci esaki, ki porcentahe ta papia di dje, si ta 1% of 2% y con ta bay hinca esaki den otro.

Maduro ta señala tambe cu tur locual cu tin di haci cu landspakket en general ta cosnan cu ta riba mesa caba den e reunionnan, aunke gobierno a huramenta apenas e siman aki. “Prome cu esey caba tur e futuro ministernan a wordo informa. Nos a informa nan ariba e situacion financiero, nos informa nan tambe ariba e parti di presupuesto 2022 y nos a informa nan tambe ariba e parti di reforma fiscal manera cu den e landspakket ta wordo pidi p’e.”

El a indica cu den tempo cu ta bin nan lo sigui duna informacion. Diamars a tuma luga e prome Conseho di Minister di Gabinete Weever-Croes II pa asina cuminsa cu e trabaonan. El a enfatisa cu aunke ministernan nobo mester di tempo pa traha riba nan ministerio, e tabata minister di finanzas caba y su ministerio a keda draai pa por keda cu e trabaonan cu ta necesario.

Maduro ta resalta cu e ta cla pa e reto, cu e ta descubri como uno cu no lo ta facil. “Nos tur sa e cartera di finanzas ta un cartera hopi importante pa cualkier gobernacion, sigur pa ora bo ta goberna den temponan financieramente dificil, e ta haci e reto mas duro”, el a expresa. “Tin hopi trabao pa haci. Nos ta haciele cu hopi smaak pa pais Aruba pasobra esaki ta un trabao na bienestar di pais Aruba y awo mas cu nunca e trabao aki tin cu wordo haci na un manera hopi serio.”

“Nos a bin ta haci e trabao akinan caba, nos a pasa un pandemia y nos a duna tur di nos banda pa sigura cu pais Aruba por a surpasa e parti akinan. Nos no ta cla ainda y hunto cu esaki pa por haya e yudansa di Hulanda. Tin hopi condicion, hopi di eseynan ta traduci nan mes den e parti financiero. Y Aruba tin cu keda cumpli pa asina por haya e fondonan necesario presta for di Hulanda. Y no solamente presta, nos tin cu bay paga esakinan back tambe, dus tur esakinan ta cosnan cu aworaki asina mes den reunionnan cu a sigui hunto cu Hulanda y den e dianan aki, ta sigui den curso”, el a agrega.

E ta splica tambe cu aworaki pa e cartera financiero loke ta bin acerca ta tur e trabaonan pa locual ta trata e landspakket. Prome cu esey tabatin e parti di supervision financiero di Caft y aworaki banda di esey ta bin tambe tur e rekisitonan pa cu e landspakket. E ta enfatisa cu e trabaonan duro cu mester haci ta pa e recuperacion di pais Aruba, “pasobra e recuperacion di pais Aruba ta depende grandemente di no solamente con nos ta economicamente, pero tambe e stabilidad financiero cu pais Aruba mester recupera”.