Minister di Finanzas, Xiomara Maduro: Dr. Raymond Gradus su presentacion ta un ‘voorbode’ pa Aruba

Minister di Finanzas, Economia y Cultura, Xiomara Maduro a referi riba loke Profesor Dr. Raymond Gradus kende ta presidente di e organo di supervision financiero CAFT a trece dilanti durante su presentacion organisa pa Aliansa Hulanda Aruba dialuna ultimo. E mandatario ta haya cu e tabata un advertencia di e reforma cu Hulanda kier wak refleha den reduccion di gasto riba cuido medico.

Den su potencia Dr. Gradus a trece dilanti riba e tema specifico di salud cu Aruba ta un di e paisnan cu mas caso di diabetes na mundo, locual tin un peso riba structura di seguro medico cu ta depende di sosten financiero di presupuesto nacional. E gasto aki awor ta nifica un 9% di nos GDP y si no ta wordo trece cambio, e peso di cuido medico lo yega un 18% di nos GDP aki 10 aña cu ta hacie algo impagabel.

E mandatario a sigura cu no por a sigui Prof. Gradus su presentacion, pero el a referi cu na Papiamento nos ta uza un palabra na Hulandes: “Esaki ta voorbode.” Pues e ta haya cu via presidente di CAFT, Hulanda ta anticipa caba kico nan tin den nan mente. E ta haya cu akinan caba e persona cu ta haci e trabao di supervision a manda un mensahe riba locual ta bay sigui nos dilanti.

Un tema cu Prof. Gradus a referi ta relaciona cu e problema di diabetes y tambe e punto di enbehecimento di nos comunidad. Actualmente tin 21 mil hende ta cobra pension di behes. Na 2035 e cantidad lo ta 30 mil locual ta nifica un peso di 100 miyon florin. Pa minister Maduro tur e gastonan aki y cuanto porciento nan ta representa riba nos GDP ta un forma pa prepara tereno pa locual lo bini. “E ta bisa bo caba aki nan cu bo mester bay introduci tur e reforma necesario,” el a expresa.

Den e landspakket cu tin riba mesa actualmente den e negociacion entre Hulanda y Aruba, tin puntonan cu Hulanda ta referi specificamente na aumento di edad di pension pa 67 aña y reduccion structura riba gasto di cuido medico. Pues e mandatario ta haya cu ora ta wordo duna e tipo di charla aki, e ta un plataforma cu nan ta uza pa manda bo caba un mensahe como pais. Esta kico ta e ‘voorbode’ of kico ta bay bini dilanti.

E ta sugeri pa tene cuenta cu loke Prof. Gradus a trece dilanti durante su presentacion pa asina bo por haya un idea di kico ta bay ta e condicionnan pa cu Aruba. Y si nos ta bay haya fondo di Hulanda, kico ta bay ta e condicionnan y kico nan ta bay keda wanta.