Diaranson Parlamento di Aruba a trata e Ley di BBO na frontera, un reunion cu a hiba un debate largo entre Gobierno y Parlamento. Den oranan laat di marduga e ley a keda aproba cu 11 voto na fabor y 9 en contra.
Tabata prome cu merdia cu e reunion a inicia na unda Minister di Finansa Xiomara Maduro a duna un update pa locual ta trata e preocupacionnan cu gremionan trece dilanti. E dia prome cu e reunion, AFBA, AHATA y ATIA a manda carta pa Parlamento cu algun preocupacion y Minister Maduro a contesta nan di biaha y a comparti esaki cu Parlamento, pa asina Parlamento por tabata tin un bista completo cu tur informacion y splicacion necesario con Gobierno a trata pa locual ta e preocupacionnan di gremionan.
Minister di Finanzas a informa cu den luna di juni Departamento di Impuesto y Departamento di Aduana a tene un total di 23 sesion cu caracter practico pa brinda informacion riba e concepto di ley di BBO na frontera, y demostra con e sistema automatisa na DIMP y Aduana lo traha den practica ora e ley bay na vigor. Durante e sesionnan e gremionan a trece nan preocupacion y preguntanan dilanti. Tin dos punto cu a resalta cual ta e descripcion di ‘handelsgoederen’ y ‘verrekening’ cu ta e proceso di restitucion di impuesto.
Pa locual ta ‘handelsgoederen,’ e mandatario a splica cu aki ta trata di tur producto cu ta ser importa cu e meta pa wordo bendi. Tur producto cu wordo importa cu e meta pa ser re-bendi tin derecho di deduccion. Pa locual ta e deduccion pa e sector di Food & Beverage, e mandatario a splica cu esaki lo wordo regla apart den un Decreto Ministerial cu ta wordo publica apart den e dianan nos dilanti.
Riba e preocupacion riba e proceso di restitucion di impuesto, gremio a indica cu nan no ta haya esaki ‘fair,’ debi cu nan tin miedo cu esaki lo afecta nan cash-flow. Minister di Finansa a splica cu e parti di ‘verrekening’ den e ley di BBO na frontera, ta forma parti di e ‘tools’ cu DIMP ta dispone pa asina por atende cu cumplimento, ‘compliance’ cu impuesto. Sin e derecho di DIMP pa ‘verreken,’ e ora un parti di e sistema pa cobra impuesto ta wordo debilita. E mandatario ta splica cu mester tene na cuenta tambe cu Pais Aruba mester por cumpli tambe cu e reglanan internacional di impuesto. Aruba no por djis cambia e sistematica di cobransa di impuesto djis pa ta complaciente y permiti evacion di impuesto. Pa e motibonan aki, Minister Maduro a indica cu no por acomoda comercio pa locual ta e punto di ‘verrekening’.
E mandatario di finanzas a sigui splica cu pa locual ta trata cumplimento di comercio, cifranan ta mustra cu negoshinan cu ta importa productonan aki na Aruba tin un suma di 6.2 miyon florin habri na impuesto. E falta di cumplimento aki tambe ta afecta e ‘cash flow’ di e caha di Gobierno.
Ta fondonan cu Gobierno mester pa asina por inverti den enseñansa, pago di pensioen, ofrece servicio na pueblo …etc…etc. Si pa yega na fondo Gobierno mester bay presta placa, esaki ta trece gasto di interes cune cu tambe ta subi gasto di gobernacion di nos Pais.
