Diamars ultimo a keda conoci den comunidad e conferencia di prensa cu Sindicato di Aduana SADA a ofrece pa medionan local, den cual nan trece dilanti preocupacion y molester tocante e caso di nombramento di un funcionario di Cuerpo di Aduana.
Segun Edward Maduro, vocero di SADA a indica den su declaracion, e nombramento ta trata di ‘un acto robes y di falta di integridad’. Pa e motibo aki nan a pidi pa gobierno, specificamente prome minister Evelyn Wever-Croes y minister di Finanzas Xiomara Maduro, un aclaracion tocante e tema aki y un investigacion urgente.
Bon Bia Aruba a tuma contacto cu minister di Finanzas, Xiomara Maduro pa haya informacion tocante su posicion tocante e declaracionnan aki, di e cual el a contesta cu e nombramento en cuestion a wordo hala aden y pa e motibo ey, e duanero en cuestion a bay hues.
Asina mes, Maduro a informa cu aworaki e caso ta bay den hoger beroep. “Mi no ta mira pakico SADA mester hiba e cosnan interno aki den publicidad, esey no ta un acto integro na mi opinion”, el a sigura.
Tambe el a agrega cu ‘ta masha mahos pa mira con ta lastra minister presidente su nomber y insinua cosnan cu no ta berdad’.
“Esey tampoco no ta muestra di integridad. Mester tene na cuenta cu un ambtenaar, sea e ta forma parti di sindicato of no, mester mustra respet pa su funcion y pa autoridad, den e caso aki sigur respet pa minister president di e pais aki. Ta di lamenta cu di e manera aki ta pone Aduana den mal luz di dia sin cu ta necesario”, el a finalisa.
