Den e dianan aki nos a observa cu oposicion ta trece dilanti cu Gobierno a subi gasto di Servicio y Producto cu 43 miyon florin. E informacion aki NO TA CORECTO.

Oposicion ta referi na un observacion di CAFT den nan conseho riba Presupuesto 2022 riba pagina 3. Den e observacion aki CAFT no ta bisa cu Gobierno a hisa gasto cu 43 miyon florin. Locual CAFT a pidi ta pa Gobierno cambia e cifra presupuesta y pa pon’e na e nivel di e gastonan realisa den aña 2020. Na ningun momento CAFT ta bisa cu Gobierno a subi gasto cu 43 miyon florin. De facto den e grafico adhunto por wak cu e gastonan di Servicio y Producto a subi cu solamente 14,6 miyon florin den e situacion di e pandemia di Covid.

Gobierno a adresa e conseho aki di CAFT y a splica cu tecnicamente no por haci e cambio aki ya cu aña 2020 no tabata un aña cu Gobierno por a opera normal debi na, entre otro, e shelter in place. Esaki a pone cu gastonan cu a wordo presupuesta no por a wordo realisa. Den aña 2020, e ‘uitputtingspercentage’ di Servicio y Producto tabata na 85% y den aña 2021 esaki tabata na 90% indicando cu Gobierno su operacion a keda atras y e gastonan no a wordo realisa conforme locual a wordo presupuesta. Cambia e cifra manera CAFT ta conseha, awor cu Gobierno su operacion ta bay mas y mas na normalidad, lo trece e problema cu lo por surpasa locual a wordo presupuesta.

Pesey semper ta bon pa ora ta trata e materia complica di finanzas publico, pa puntra informacion en bes di sali critica sin compronde locual ta wordo bisa den consehonan di CAFT.

Nota di redaccion:

E parti di e conseho di CAft na cual e comunicado di prensa di ministro encarga cu finanzas ta referi, ta bisa textualmente: “E post goederen en diensten (bienes y servicio; red.) ta mustra un aumento di AWG 27 miyon compara cu e presupuesto complementario 2021. Mirando e ‘onderbesteding’ den añanan anterior CAft ta conseha, conforme cu e conseho riba presupuesto complementario 2021, pa baha e post goederen en diensten den e proyecto di presupuesto te na e nivel di realizacion 2020.”

Trasfondo di e conseho di CAft ta aparentemente nan opinion cu gobierno di Aruba mester baha su gastonan mas tanto posible, y ta constata cu e gastonan na 2022 lo ta mas halto cu na 2019; CAft: “E gastonan mas abao ta keda principalmente splica pa e desaparicion di e medidanan di apoyo cu na 2020 y 2021 tabata necesario pa via di e consecuencianan di e crisis di corona. Sin embargo, e gastonan na 2022 ta mas halto cu na 2019. CAft ta di opinion cu Aruba, en vista di e Perdida di entrada como consecuencia di e efectonan di e crisis di corona(virus), mester haci un esfuerzo extremo pa baha e gastonan.”

Gobierno no ta di acuerdo cu esey, pa e motibonan splica den e comunicado. E diferencia di opinion ta keda cu gobierno ta desea di bolbe ‘na normalidad’ encuanto gasto – aumentando -, mientras e colegio consultivo ta haya cu mester corta gasto mas tanto posible: ta ‘agree to disagree’?