Dos dia pasa, un noticiero local online a publica un relato den cual a indica cu trahadornan den servicio di Stichting Algemene Bejaardenzorg Aruba y Centro Medico pa Cuido Cronico ta bay den accion di welga na casnan di cuido. Esaki relaciona cu falta di pago di Bashi Premie.

Segun acuerdonan cu e instancianan en cuestion a cera cu gobierno di Aruba na aña 2014, te cu aña 2024 tur empleado y fundacion cu ta ricibi subsidio mester cobra un Bashi Premie, y pa aña 2024 esaki mester ta 2024 florin.

Sinembargo, segun e relato den medionan di comunicacion local, SABA y CMCC a indica cu no a ricibi e placa aki for di gobierno na tempo y e consecuencia di esaki lo ta cu nan no lo por paga e Bashi Premie pa dia 10 di januari. Nan a indica cu nan no tin placa den reserva pa paga e placa trempan pa e trahadornan.

Riba pagina di Facebook di Gabinete Wever-Croes y riba su propio pagina di Facebook, Minister di Finanzas, Xiomara Maduro a post un imagen mustrando e relato en cuestion, y a comenta: “Nan ta habri aña ta malinforma y fomenta rabia den comunidad. Jammer. Aki ta sigui e informacion corecto:
*Bashi Premie pa ambtenaar ta wordo paga dia 10 di januari 2023.
*Tur fundacion cu ta wordo subsidia ta haya nan subsidio tur fin di luna.
*Tur fundacion ta percura pa e payroll di nan trahadornan, pa paga salario y otro beneficio.”

Tocante e declaracion cu ta pa motibo cu gobierno no a manda e placa trempan no por a paga e empleadonan dia 10 di januari proximo, Wever-Croes a indica: “Desde aña 2017, Gobierno ta manda un solo suma pa e fundacion, y nan mester percura pa haci reservanan necesario si e fundacion a acorda cu nan trahadornan pa paga mas trempan. Esaki no ta deber di gobierno.”

Usuarionan di Facebook a reacciona di diferente manera. Mientras algun tabatin critica pa e medio di comunicacion pa e manera den cual a trece e relato dilanti, otronan a duna aclaracion y hasta a comparti nan propio experiencia personal. Usuario L.M.L.Q. a bisa: “Dia 10 nan ta paga Bashi Premie. Ami a traha payroll pa cinco aña pa un fundacion y tur aña dia 10 esaki mester wordo haci. Y no ta gobierno tin cu paga Bashi Premie, e fundacion cu ta ricibi subsidio for di pais Aruba tin cu percura pa esey wordo haci.” Ademas e usuario a aclaria cu no ta tur trahador ta haya e mesun areglo. “Si e ta para den e arbeidsovereenkomst e ora si. Den mi caso ami no tabata haya ningun toelage paso mi a cuminsa traha na 2017 y e Subsidieregeling a cambia y a bisa esey for di comienso.”