Siman pasa, Algemene Rekenkamer Aruba (ARA) a publica su raport ‘Op afstand, maar toch dichtbij’ riba e relacion di Gobierno y su companianan estatal. Minister di Finanzas, Xiomara Maduro ta comparti e preocupacionnan di ARA y ta informa cu a tuma accion caba riba esakinan den tema B di Landspakket riba e ‘deelneming y dividendbeleid’ pa Gobierno di Aruba.
Minister di Finanzas ta informa cu e prome paso ta tuma den e investigacion ‘Doorlichting overheidsbedrijven Aruba,’ haci na aña 2022 cu ta disponibel riba www.gobierno.aw via e link https://cuatro.sim-cdn.nl/arubaoverheid2858bd/uploads/doorlichting_b2_landspakket.pdf.
“Awo nos ta bezig cu e di dos paso cu ta e plan cu KPMG Advisory di Hulanda y e compania local PKF ta trahando pa Gobierno por introduci y hiba acabo un maneho di participacion y dividendo pa companianan estatal. E maneho lo conta pa e companianan estatal Setar, Freezone, Post Aruba, AAA, Elmar, WEB, RDA, APA, ANSA, Arubus y Utilities. Pa Gobierno, Minister di Finanzas lo ta encarga pa hiba acabo e maneho di participacion y dividendo na e companianan estatal.” Ta e reacion di Minister Maduro di Finanzas riba e raport mas reciente aki di ARA.
