Minister di Finanzas, Economia y Sector Primario, Geoffrey Wever, acompaña pa Minister Plenipotenciario na Washington D.C., Sra. Zulema Erasmus-Dabian, director di Departamento di Asunto Economico, Sra. Maria Dijkhoff-Pita y representante di Departamento di Finanzas, Sr. Louis Paris y Sra. Emelien Kelly, ta participando na e IMF Spring meetings cu ta tumando lugar na Washington D.C. di 22 pa 25 di april.

E prome reunion tabata un presentacion di “Demystifying the World Bank” unda a splica e diferente tipo di productonan y asistencia cu tin disponibel y a duna un splicacion di e cinco (5) institucionnan di e World Bank Group. Aruba, door di ta parti di Reino Hulandes, no ta ricibi fondo di World Bank, pero si por haci uzo di e asistencia tecnico cu nan ta ofrece riba diferente tereno a base di un acuerdo di pago.

E di dos reunion tabata un encuentro cu e Executive Director di World Bank, Sr. Eugene Rhuggenaath, pa elabora mas riba e diferente productonan y asistencia tecnico cu e World Bank por ofrece. A tuma luga un dialogo habri riba e desafio cu Aruba ta enfrenta como pais autonomo den Reino, particularmente den acceso na fondo y asistencia tecnico. Minister Wever a gradici Sr. Rhuggenaath pa su disponibilidad pa pensa hunto cu e islanan den region y explora manera pa amplia uzo di e recurso cu e World Bank tin disponibel.

Mas durante e dia, Minister Wever a reuni tambe cu Sr. Matthew Byrne, Director di CARTAC (Caribbean Regional Technical Assistance Centre) y Sra. Priyanka Chaturvedi di IMF su division di Global Partnerships. A trata e portfolio di trabou realiza cu Aruba y a identifica areanan pa futuro colaboracion, incluyendo maneho presupuestario, fortaleza di institucionnan fiscal y desaroyo di capacidad local. Tambe a papia di asistencia tecnico den cuadro di Climate Change Risk Financing, un topico cu tin hopi atencion den organisacionnan internacional y di Hulanda.

Tambe a reuni cu varios representantenan di Hulanda na World Bank y IMF cu kendenan a intercambia informacion valioso pa sigui cu un bon cooperacion cu World Bank, IMF y Hulanda.

“E tipo di colaboracion tecnico y institucional cu World Bank, IMF y CARTAC ta ofrece ta crucial pa Aruba su sostenibilidad fiscal y desaroyo economico”, segun Minister Wever.

Minister Wever a inicia tambe cu reunionnan cu instancianan financiero y lo sigui e trayecto cu encuentronan importante den e dianan binidero, incluyendo banconan internacional y agencia di “credit rating”, pa representa Aruba su interes den un manera proactivo y strategico.

Acompañamento mediatico ta genera critica
 Algo cu a hala atencion – y a genera critica entre ciudadanonan – ta e hecho cu e minister a bay compaña pa Brian Koolman, representante di portal noticiero 24ora. Mientras cu e medio ta reportando riba e reunionnan y trabao di e minister na Washington, ciudadanonan riba rednan social a critica e decision di inclui un medio di comunicacion priva den e delegacion oficial di Aruba cu ta bishitando institucionnan di importancia internacional.

“Kico Brian a bay haci? Negocia?” un usuario di Facebook a cuestiona. Otro usuarionan a cuestiona si gobierno ta cubriendo e gasto di e biahe pa e reportero usando fondonan publico, of si ta e medio a financia su propio biahe. Mayoria di comentario a enfoca riba e hecho cu no ta inusual na Aruba cu gobierno ta inclui medionan di comunicacion na momento di biaha, pero ta critica esaki como mal gastamento di placa. “Abuso cu placa di pueblo a cuminsa,” otro usuario a lamenta. “Ta na unda di mundo bo ta tende cu un persona cu ta duna noticia ta biaha, haya tur cos paga?” otro usuario a agrega. “E placa no ta di nan.”

Mirando cu no tin confirmacion pa e rumornan riba rednan social indicando cu ta gobierno a paga pa e reportero bay como parti di e delegacion, Bon Dia Aruba a manda pregunta pa minister Geoffrey Wever, pidiendo si e por confirma of clarifica e situacion.

“Mi no a paga 24ora niun florin pa cubri e biahe aki,” Wever a reaccion. El a splica cu e medio a yega di compaña e minister mas biaha durante biahenan, pero ta riba nan propio costo. “E unico cos cu nos ta haci ta duna nan acceso na nos agenda,” pa nan sa unda pa bay pa saca potret y reporta riba e hechonan. “Pero zero payment,” el a finalisa.