Durante un conferencia di prensa di Gobierno di Aruba Minister Xiomara a elabora riba pago di overtime. Siman pasa Gobierno di Aruba pa medio di Prome Minister di Aruba a anuncia e maneho nobo di overtime pa e periodo di 15 di september te cu fin di aña, esaki ta necesario ya cu gobierno a bin ta baha gastonan di gobernacion.

Den gasto di gobernacion un tercer parti ta gasto di personal

Tin un debate publico riba gasto di personal y tambe e supervision financiero di CFT ta recomenda pa contene e gastonan di overtime. Ademas tin un protocol cu Hulanda cu Aruba mester tene na dje. Un tercera parti di gasto di gobierno ta gasto di personal y den esaki tin un parti substancial di e gastonan aki ta gasto di overtime den gobierno.

Diferente instancia a investiga e problematica di overtime

Minister Maduro a informa cu Gobierno a ricibi recomendacionnan di diferente instancia manera e.o. Contraloria General, CFT, IMF, cu a investiga e parti overtime y nan a indica tambe cu ta bon pa atende cu e gastonan aki. Controlaria General a trece dilanti cu cada departamento ta responsabel pa tuma medidanan necesario internamente pa e maneho di gastonan di overtime.

Colleges Financieel Toezicht a recomenda cu mester mantene un maximo pa locual ta overtime pa evita exceso y garantisa un reparticion igual di overtime entre e empleadonan di un departamento, mirando cu tin algun departamento cu ta bisto cu e empleadonan ta traha structuralmente 20 ora of mas na overtime. IMF ta recomenda pa reduci overtime, ta parce cu e nivel halto di overtime ta relaciona cu e problema di ao y cu e reduccion di maximo pa pago di overtime lo por yuda reduci e gastonan riba presupuesto.

Mester tuma medida pa no surpasa e presupuesto

Siman pasa Minister President a trece dilanti cu locual cu tin e aña aki riba presupuesto, tur cos ta mustra cu esaki lo bay surpasa e suma aki. Pa por baha gasto di personal, mester tin control riba e gastonan di overtime p’esey mester tuma medida pa no surpasa e fondonan aki. Pa aña 2022 tin 21.5 miyon florin presupuesta pa pago di overtime pa full gobierno.

Na e momento aki te cu augustus ya tin 14.1 miyon cu a wordo realisa na gastonan di overtime. Minister Maduro a trece dilanti cu Departamento di Recurso Humano a pidi Minister Presidente pa pasa un circulario den cual ta “cap” e gastonan di locual ta overtime. “Cap” e oranan cu por traha na overtime y algun otro rekisitonan e.o. gerencia lo mester entrega un plan con ta bay reduci e gastonan te cu fin di aña.

Gobierno a bin ta cumpli cu pago di overtime

E anuncio di e maneho nobo riba overtime a trece reaccion y sindicato di Polis a declara cu Gobierno kier pa Polis comete atraco pa haya su salario. Minister Maduro a splica durante e conferencia di prensa cu e declaracion no ta na su luga, pasobra gobierno a bin ta paga overtime y minister Maduro a comparti e cifranan pa locual ta e pago di overtime di aña 2017 pa mita di aña 2022. E instancianan cu overtime ta mas halto ta Cuerpo Policial, KIA, Brandweer y Cuerpo Especial Arubano. Ademas pa locual ta Polis, prome, durante y despues di e Pandemia, Gobierno a percura pa paga salario y 100% di tur overtime di Polis. E pagonan haci di 2011 pa mita di 2022 ta mustra cu pa aña gobierno ta paga Polis un promedio di 11 miyon na overtime. E mandatario a splica cu si no frena e overtime, esaki lo surpasa e fondonan disponibel riba presupuesto pa pago di overtime, cual lo trece mas problema di likidez pa Aruba.