E siman aki Minister di Finanzas, Xiomara Maduro a informa comunidad riba e fiansa cu a logra cera riba mercado internacional di capital pa por logra cubri e necesidad financiero y paga e debenan cu ta madura den aña 2024. E mandatario a splica cu a logra haya e fiansa aki na un interes di 6,3% cu ta uno bon considerando e hecho cu Aruba ta bay back e mercado internacional despues di 6 aña y despues di e daño financiero y economico cu Covid-19 a ocasiona.
Anunciando e refinanciamento nobo e siman aki, minister di Finanzas a nota cu den Presupuesto 2024 Parlamento di Aruba a autoris’e pa busca e fondonan necesario pa cubri e necesidad financiero di Gobierno di Aruba di 567,7 miyon florin pa aña 2024. Ta trata di debenan cu ta madura riba mercado local y internacional. Pa locual ta e debenan riba mercado internacional, Minister di Finanzas a informa den un comunicado di prensa cu Aruba despues di 6 aña a bolbe riba e mercado internacional di capital y a logra cera un fiansa di 134,5 miyon dollar na un interes di 6,3% pa paga e debenan cu ta madura.
E mandatario a informa cu e ultimo biaha cu Aruba a busca un fiansa riba e mercado internacional di capital tabata na aña 2018. Gabinete Wever-Croes na aña 2019 a refinancia e debenan riba mercado local. Na comienso di e pandemia a bolbe logra refinancia e debenan riba mercado local. Sinembargo durante e añanan 2021 y 2022 di pandemia, Aruba ta logra refinancia e debenan internacional cu a madura cu yudansa di un fiansa di Hulanda. E debenan cu a madura den aña 2023 a wordo financia tambe riba mercado local, ya cu e condicionnan pa Aruba na e momentonan eynan no tabata positivo pa subi e mercado internacional di capital. Awo den aña 2024, cu e meta pa cuida e mercado local, a dicidi pa subi e mercado internacional di capital pa refinancia e debenan cu ta madura den aña 2024.
Cu guia y sosten di e banconan Santander y Citi, Minister Maduro a inicia e proceso pa subi mercado internacional di capital. A busca un tercer rating cerca Moody’s y a logra un di dos investment rating pa Aruba. Na juni 2024 durante un Roadshow, Minister Maduro a bishita diferente inversionista pa presenta e storia di recuperacion financiero y economico di Aruba despues di Covid-19. Despues a haya aprobacion di Conseho di Minister di Reino dia 10 di juni 2024 conforme art. 29 Statuut pa busca 160 miyon dollar riba mercado internacional di capital. Dia 22 di juli 2024 Gobierno di Aruba a emiti bono internacional pa e suma di 134,5 miyon dollar y riba 15 di augustus ta logra cera e deal den cual Aruba ta haya un fiansa di 80 miyon dollar den 5 aña na 6,3% di interes y 54,5 miyon dollar den 6 aña na 6,32% di interes. Cu e fiansa aki, Minister Maduro ta logra pa cubri e necesidad financiero di Aruba pa aña 2024 na un manera exitoso.
Sinembargo, den un comunicado di prensa posterior, e minister a lamenta cu un medio di noticia na Aruba a publica e noticia na un manera incorecto, y a publica cu ‘Aruba mester a fia na un interes hopi mas halto cu si el a haya ayudo di Hulanda’ sugeriendo cu Aruba lo tabata por a fia e placa necesario na Hulanda na un interes mas abao.
Minister di Finanzas ta enfatisa cu pa financia e debenan externo cu ta madura den aña 2024 no tabatin ningun proposicion di Hulanda riba mesa pa fia Aruba placa na interes mas abao. Hulanda te ainda ta dispuesto pa duna un interes mas abao cu e 6,9% solamente pa e debe di Covid-19 cu Aruba tin cu Hulanda. Tur otro debe local of internacional cu Aruba tin, ta Aruba mes mester busca financiamento p’e.
