For di luna di februari, a bin dilanti e noticia cu Aruba hunto cu Corsou ta aparece riba lista “shinishi” di Comision di Union Europeo pa loke ta trata paraiso di impuesto y minister di Finanzas di Aruba, Xiomara Maduro a reacciona riba esaki indicando cu e informacion no tabata corecto, na e momento ey.
Ayera, e website local ‘NoticiaCla’ a publica un articulo na unda e minister di Finansas di Hulanda, Sigrid Kaag, e siman aki a confirma na Tweede Kamer cu Aruba si ta riba lista shinishi di paraiso fiscal.
“E paisnan riba e lista fiscal shinishi, a priminti pa dentro di un termino specifico cumpli cu e standard fiscal” e mandatario a informa na Tweede Kamer pero, “si esey no logra, e ora e paisnan lo bay riba e lista preto fiscal (paraiso fiscal)” e mandatario Hulandes a sigui bisa. “Den cuadro di esaki, Aruba y Corsou a ser poni riba e lista shinishi pa motibo ambos pais a resulta di no ta cumpli completamente cu e norma pa intercambio automatico di informacion, tanto Aruba como Corsou a compromete riba nivel halto politico, cu pa mas tarda tres kwartaal di 2024 nan lo cumpli cu e standard rekeri” e articulo di NoticiaCla ta menciona loke e mandatario a sigura.
Dia 7 di maart ultimo, minister di Finanzas di Aruba, Xiomara Maduro a publica riba su rednan social cu “Aruba NO ta un Paraiso Fiscal y tampoco ta na caminda pa bira esaki. Na 2018 Aruba a compromete cu Global Forum pa haci intercambio internacional di informacion fiscal posibel. Aruba no ta cla ainda y nos ta premira cu na juni 2023 por haci e cambionan den ley cu ta necesario pa asina por completa e trabou y haci e intercambio di informacion fiscal posibel.”
Na februari ultimo, a manda un comunicado di prensa pa informa cu Gobierno di Aruba, pa medio di Departamento di Impuesto tin un relacion estrecho cu e seccion di impuesto di Comision di Union Europeo pa por cumpli cu tur e rekisitonan ora cu ta trata normanan internacional pa evita cu Aruba ta ser categorisa como un pais complaciente pa contribuyentenan por evadi impuesto.
Segun el a sigui splica cu e siman aki e delegado di Comision di Union Europeo cu ta atende cu Aruba, a confirma cu Aruba su compromiso riba criteria 1.1. di AEOI lo ser registra door di ECOFIN.
Den un comunicado di prensa, e delegado di e Comision di Union Eurpeo a clarifica cu lo inclui Aruba riba e lista di Anexo II di “Council Conclusions” cual ta un documento cu ta indica cu ambos Aruba y Corsou a compromete nan mes pa mehora nan determinacion di e Forum Global pa loke ta trata e intercambio automatico di informacion ariba cuentanan financiero.
