Minister di Finanzas ta indica cu e resultado preliminar di e investigacion di IMF riba e gastonan di personal di Gobierno, ta indica cu Gobierno ta pagando den 2019 e suma total di 605 miyon florin na 7.195 trahado den sector publico. Esaki ta e suma total cu ta bay pa paga empleado publico y ‘gelijkgestelden’ cu nan salario ta wordo subsidia pa Gobierno. E suma aki ta 12% di nos GDP, indicando cu di e esfuerso di full nos Pais (publico y priva), 12% ta bay na pago di salario di e trahado publico.
Den un comunicado di prensa, e mandatario ta enfatisa cu mester tene na cuenta cu, di un Presupuesto 2019 aproba pa Parlamento cu 1.423 miyon florin na entrada, 605 miyon florin ta bay paga e trahado publico y 232 miyon florin ta bay na pago di interes. Esey ta nifica cu ta resta solamente 586 miyon florin pa paga pa tur otro necesidad cu tin pa entre otro salubridad, enseñansa, siguridad, infrastructura, comunicacion y medio ambiente.
Si haci nada na aña 2020 e gastonan di personal lo bira 626 miyon florin, cual ta nifica un subida di 3.4% compara cu aña 2019.
E informacion di e resultado preliminar aki ta masha importante, ya cu Gobierno ta haya un bista amplio y concreto con e situacion ta y kico mester haci pa mitiga e gastonan, pa asina por tene e gastonan manehabel y pagabel.
Minister di Finanzas, Xiomara Ruiz-Maduro ta comparti e resultadonan preliminar aki cu pueblo di Aruba y trahadonan den sector publico, pa por haya un bista di e gastonan di personal di e aparato publico.
E mandatario ta enfatisa cu Gabinete Wever-Croes ta trahando seriamente pa atende e gastonan di personal den sector publico y cu Gobierno ta tuma decisionnan cu ta responsabel pa nos Pais Aruba.
Gobierno mester di comprendemento pa cu situacion financiero y tur hende di bon boluntad mester por compronde cu e espacio pa crece gasto di personal ta hopi, pero hopi limita.
