Recientemente, Conseho di Minister a reuni y cera conoci cu e Secretario di Estado di Relacionnan di Reino nobo, señor Zsolt Szabó. Minister di Finanzas, Xiomara Maduro tabata presente durante e reunion unda a duna informacion tocante trabao pa mehora maneho financiero den cuadro di e landspakket cu a firma cu Hulanda.
Segun un comunicado di gobierno, durante e reunion cu Secretario di Estado Szabo, cada minister a elabora riba su prioridadnan den gobernacion y Minister Maduro a elabora en corto riba e trabaonan cu ta wordo haci den cuadro di e Landspakket pa mehora e maneho financiero na Aruba. Despues a sigui un presentacion di Director di Departamento di Finanzas, den cual a duna un relato mas amplio di e puntonan cardinal pa mehoracion financiero na Aruba cu ta encera. Entre esakinan, a destaca e cambio di ley di e sistema di raportahe financiero, introduccion di e modelo di ‘3 lines of defence,’ mehoracion di sistema di informacion financiero computarisa y cambio di ley pa e maneho di materiaal den Gobierno.
Segun e comunicado di gobierno, Szabo y su delegacion a keda impresiona cu e cantidad di trabao cu ta haci pareu pa e ekipo di profesionalnan Arubano pa por mehora e maneho financiero na pais Aruba.
Minister di Finanzas a bisa di ta contento di por a haya e oportunidad pa cera conoci cu e Secretario di Estado nobo y alabes di por a dun’e un bista di locual ta e trabounan cu ta wordo haci door di su ministerio y su ekipo. Cu e presentacion cu Minister di Finanzas a duna por bisa cu señor Szabó a keda bon informa y sa den ki direccion Gabinete Wever-Croes ta hibando Aruba pa locual ta trata e parti di e maneho financiero di nos pais.
