Diaranson, Minister di Finanzas, Xiomara Maduro, hunto cu e profesionalnan di Departamento di Impuesto a reuni cu Secretario di Estado Sra. Alexandra van Huffelen pa asina duna un bista di e trabaonan cu ta wordo haci den cuadro di Landspakket riba e tereno fiscal na Aruba.
Durante e reunion a brinda un presentacion di e cambionan cu a wordo introduci pa por cumpli cu tema C di e Landspakket. Entre nan, a duna un bista di e implementacion di e Plan di Impuesto 2023 y e resultado te awo di e cambionan fiscal aki cu ta toca tema C1 di e Landspakket. A splica tambe riba e bon noticia cu Aruba ta riba e lista di cooperacion y transparencia fiscal di OECD cu ta toca tema C2 di e Landspakket. Fuera di esaki a indica cu ta trahando awo riba tema C3 y C4 di e Landspakket pa fortifica e administracion y hisa e nivel di cumplimento/compliance. Por ultimo a indica tambe cu reunionnan ta wordo hiba pa yega na un palabracion fiscal entre Hulanda y Aruba den e prome kwartaal di aña 2024 pa asina por cumpli tambe cu tema C5 di e Landspakket.
E reunion a bay den bon ambiente na unda cu Minister Maduro y e profesionalnan di DIMP a tuma tempo pa asina por a contesta tur pregunta y brinda mas informacion pa asina e Secretario di Estado Hulandes por ta miho informa di e trabaonan riba e tereno fiscal na Aruba.
Minister Maduro ta gradici Sra. Van Huffelen pa su bishita y e cooperacion di Hulanda pa yuda na fortifica DIMP. E mandatario ta gradici tambe e ekipo di DIMP pa e gran trabao cu ta wordo haci pa Aruba por conta cu un sistema fiscal cu ta traha na bienestar di nos Pais.
