Den cuadro di trabaonan necesario pa cumpli cu e reformanan den e Landspakket, Minister di Finanzas, Xiomara Maduro a reuni cu Professor Roger Hosein di University of West Indies.
Segun un comunicado di gobierno, ta trata di un investigacion cu Professor Husein ta haciendo pa Minister di Economia, Geoffrey Wever, riba tema E6 di Landspakket pa prepara un bista detaya di e oportunidad economico pa e economia di Aruba, pa cual a desea di reuni tambe cu ex-Ministernan di Economia di Aruba.
Riba dialuna 15 di juli, Minister di Asuntonan Economico, Comunicacion y Desaroyo Sostenibel, mr. Geoffrey Wever a reuni digitalmente cu Profesor Roger Hosein di University of West Indies na Trinidad y Tobago. Meta di e reunion aki ta pa oficialmente start un estudio macro-economico pa Aruba. Hulanda ta financia e investigacion aki cu tin un costo di 25mil dollar. Durante e reunion virtual aki, minister Geoffrey Wever hunto cu Departamento di Asuntonan Economico, Comercio y Industria a elabora riba e duracion y contenido di e estudio macro-economico pa Aruba di Profesor Roger Hosein.
E estudio macro-economico pa Aruba ta e resultado di e bon cooperacion entre Aruba y Hulanda, segun un comunicado di gobierno. Riba peticion di minister Geoffrey Wever, Conseho di Minister a aproba e peticion pa Profesor Roger Hosein haci un estudio macro-economico pa Aruba, cu lo enfoca riba un analisis riba e structura di Aruba su economia y lo ta riba un analisis di data manera entre otro GDP, importacion y exportacion, “exchange rate” y inflow di “foreign direct investment”. Un estudio manera esaki ainda no a ser ehecuta na Aruba.
Presente na e reunion mas recien tabata minister Xiomara Maduro y su consehero, Sr. Swaen, kendenan ta ex-ministernan encarga cu Asunto Economico. Nan a contesta algun pregunta di Profesor Hosein riba economia di Aruba. Entre nan, e desaroyo di Aruba su GDP y e participacion di e mercado laboral pa contribui na e crecemento economico di Aruba.
Minister Maduro a brinda un bista riba e trabaonan cu a haci hunto cu stakeholders na aña 2019 pa yega na identifica e ‘six promising sectors’ cu ta indica den cual direccion por diversifica e economia di Aruba. E mandatario a referi tambe na e ‘Economic Policy, a strong and resilient economy 2019-2022’ cu ta contene e maneho cu a wordo hiba den e añanan como Minister encarga cu Asunto Economico.
