Den cuadro di introduccion di un Begrotingskamer pa Aruba, Minister di Finanzas, Xiomara Ruiz-Maduro a reuni cu Presidente Swaen, cu experto Croes y miembro Guaimo di e Comision ‘Versterking Democratisch Bestel’ cu ta trahando pa fortifica y independisa nos Colegionan Halto di Estado y tambe ta trahando pa e introduccion di un Ombudsman y Begrotingskamer pa Aruba.
Segun un comunicado di gobierno, Swaen a duna un bista di tur e trabounan cu ya a wordo haci pa e Comision y a splica di e cambionan necesario den nos Constitucion (Staatsregeling) pa asina por concretisa e trabounan. Nos Constitucion, entre otro, mester bay wordo adapta pa asina haci cambio di mehoracion pa funcionamento di Conseho Consultativo (Raad van Advies) y pa integra e Begrotingskamer como parti di e Colegio Halto di Estado aki. Banda di esaki, cambionan na fabor di e miho funcionamento di Controlaria General y Parlamento tambe ta bay rekeri adaptacion di nos Constitucion.
Cu Ruiz-Maduro, e comision a intercambia idea tambe riba e Ley pa Responsabilidad Fiscal, den cual ta stipula norma financiero cu Gobierno lo mester tene su mes na dje pa por percura pa un maneho financiero sostenibel pa Pais Aruba. E ley aki lo sirbi como enfoke tambe pa e Begrotingskamer por haci su trabou di conseho riba e ehecucion di e presupuesto di Pais Aruba.
