Cifranan di e cuater kwartaal di 2020 ta confirma cu Aruba a perde un tercera parti di su economia. Asina Minister Finanzas y Asuntonan Financiero Xiomara Maduro ta informa College Aruba College Financieel Toezicht, CAft, den e di cuater reportahe di ehecucion pa 2020.

E cifranan cu a presenta den e reportahe ta di e administracion financiero central di Gobierno, unda a tene cuenta cu e costonan cu a keda calcula mas tanto posibel y cu e medionan menciona ta basa riba realisacion di entrada pa 31 di december. E costonan cu ainda mester drenta pa medio di otro factura y cuenta ta inclui, pero segun un calculacion. E reportahenan di cada kwartaal ta cifranan temporario y no ta controla pa exactitud pa medio di Direccion di Finanzas.

Segun Minister Maduro, meta di e reportahe di ehecucion ta pa duna informacion y responsabilisacion na Parlamento di Aruba, Conseho di Minister y CAft, pa loke ta ehecucion di presupuesto, realisacion di costo y medio, realisacion di capital, financiamento y maneho di debe. Ademas ta duna informacion riba e posicion di likides y e desaroyonan den e maneho financiero.

Un tercera parti di economia total

E Minister a reitera cu Aruba ta den un situacion di crisis causa pa COVID-19, y cu pa e motibo aki mester a desvia di e normanan presupuestario acorda cu Gobierno Hulandes, estableci den e Protocol Aruba. Hulanda a bay de acuerdo pa desvia di e normanan di e protocol aki, cu tabata pa 2019 pa 2021, cu a nifica cu Aruba no a logra e surplus presupuestario di 0.5 porciento di e Producto Bruto Nacional, GDP.

Conseho di Minister di Reino a dicidi riba 13 di november 2020, cu e deficit presupuestario maximo pa 2020 ta 808 miyon florin. A traha un presupuesto di emergencia basa riba un pensamento cu e fronteranan di Aruba lo keda cera te fin di 2020, y a ahusta e presupuesto aki segun e realidad. Pero, e hecho cu Aruba a haya un di dos ola di infeccion di COVID-19 a experiencia un retraso pa un posibel recuperacion di turismo. Como tal, a haci un calculacion nobo di e contraccion economico y aki a conclui cu Aruba a perde 33 porciento di su Producto Bruto Nacional. Finalmente a logra un sosten di likides di Hulanda pa medio di un prestamo di 209 miyon florin. E di tres tranche aki a yega Aruba den e di ultimo kwartaal di 2020.

Realisacion presupuesto 2020

Pa 2020, Aruba a logra 1071,2 miyon florin na medionan. Di esakinan 893,4 miyon florin pa bin di belasting, cu ta 83,4 porciento di tur e medionan (entrada). E impuestonan directo y indirecto a produci hunto un realisacion presupuestario di 109,9 porciento. E otro tiponan di medio a percura pa 177,9 miyon florin den caha di Gobierno.

Sinembargo, e costonan total pa 2020 a yega na 1821,0 miyon florin cu ta 90.3 porciento di e presupuesto. E transferencianan ta forma e parti mas grandi di e costonan, cu a suma na 494,4 miyon florin, cu ta mas cu un cuarto di e gastonan total, esta 27,3 porciento. Costo di personal ta e di dos gasto mas grandi, cu a suma na 427.7 miyon cu ta 23,5 porciento di e gastonan total. E gastonan relata na pago di interes a suma na 234,4 miyon florin, cu ta 12,9 porciento di tur e gastonan, unda a realisa 99,3 porciento di tur e gastonan aki cu tabata presupuesta. Subsidionan ta forma 10,5 porciento di e costonan total, pa un suma di 191,9 miyon.

E deficit presupuestario pa fin di 2020 tabata di 749,7 miyon florin.