Minister di Finanzas a anuncia beneficionan di reforma fiscal

Ayera pa 2or di atardi gobierno a convoca un conferencia di prensa extraordinario, cu a conta cu presencia di minister presidente, Evelyn Wever-Croes, minister Finanzas y Economia, Xiomara Ruiz-Maduro y minister di Husticia, Andin Bikker.

Den e conferencia aki Ruiz-Maduro a anuncia loke e mes a yama un ‘bon noticia’ relaciona cu incentivonan fiscal of reduccion di belasting of montante di entrada liber di impuesto (belastingvrije voet).

Cambio reforma fiscal.
E anuncio aki a tuma luga prome cu gobierno lo bin cu cambio riba e ley di reforma fiscal, entrante otro aña. E mandatario a laga sa cu nan ta trahando riba dje, pero tin un retraso. Nan no por a keda cla prome cu 31 di december, pero si nan a dicidi pa anuncia caba locual ta beneficioso.

Ruiz-Maduro a bisa cu nan ta buscando e balans den belasting. Esaki ta pone cu ‘caminda ta rebaha, otro caminda ta subi’. Pero e otro grupo caminda e belasting lo bay subi, gobierno ta buscando un compensacion di otro manera. Pues e ta haya cu esaki ta keda un trabou continuo, ya cu pa hopi tempo Aruba no a conoce un reforma fiscal. P’esey nan a opta pa haci esaki den fase. Cada fase tin su parti cu algun grupo ta bay ta contento y otro ta bay ta menos contento, segun e mandatario.

Reduccion impuesto.
Ayera Ruiz-Maduro a reitera cu esaki ta sin duda un bon noticia, ya cu ora ta wordo ahusta e montante di loke ta liber di impuesto (belastingvrije voet), esaki ta subi di 27.751 y e ta bira 28.861. El a splica cu tur esunnan cu ta cobra menos cu e suma aki, no ta paga belasting. Tambe el a menciona cu na inicio di aña a keda anuncia cu un grupo grandi di persona no mester paga impuesto. Aworaki cu e ahuste nobo aki, tin un cantidad di persona cu lo cay bou di e plafond aki.

E mandatario a bisa door di e subida di salario minimo anuncia recientemente, nan a dicidi di haci algun ahuste riba pago di impuesto di entrada, tanto e loonbelasting y inkomstenbelasting. Ta asina cu e montante di entrada cu ta liber di impuesto ta wordo subi. Pero hunto cu esaki tambe gobierno a dicidi pa por rebaha tanto e loonbelasting como e inkomstenbelasting di acuerdo cu e indice di inflacion di 2019. Segun e cifra di Oficina Central di Estadistica (CBS) e tabata un 4%, el a indica.

Den nos ley di belasting den e caso aki tabatin e obligacion pa ora cu tin inflacion ahusta automaticamente e loonbelasting. Pero for di 2015 a kita esaki for di e ley, y solamente a keda na discrecion di e minister pa e dicidi si ta ahusta e loonbelasting na inflacion of no.

Nan a exhibi un tabla di e montante di entrada liber di impuesto teniendo na cuenta nan entrada pa luna. El a trece algun ehempel simpel pa ilustra e efecto di e decision aki. Por ehempel, esunnan cu nan entrada ta 2,400 florin of menos pa luna, bo tabata paga 146 florin pa aña na 2019. Pero pa aña 2020 nan no ta paga belasting ariba esaki. Tambe si na 2019 bo entrada pa luna tabata menos cu 2,830, bo tabata paga 869 florin di belasting pa aña. Awor pa aña 2020 bo lo bay paga 713 florin pa aña. Y si na 2019 bo tabatin un entrada di menos cu 5,490 florin pa luna, bo tabata paga 5837 florin pa aña. Pa 2020 bo lo bay paga 5412 florin pa aña.

“Nos ta haci e cambionan necesario na inflacion y asina tur esunnan cu ta traha y cu ta haya un entrada, ta haya un alivio tambe pa e parti di inflacion,” el a declara. E ta haya cu hunto cu e rebaho di 10% riba tarifa residencial di coriente y 7% pa esun comercial lo contribui pa brinda un alivio grandi riba costo di bida.

Sector comercial.
Encuanto e beneficionan pa e sector comercial, e mandatario a trece dilanti dos punto. Na 2019 sector comercial tabatin oportunidad riba dividendo. Of e belasting of inkomstenbelasting cu nan mester paga di e shareholder, ora cu nan ta saca e dividendo. Esaki normalmente ta na 25%, y gobierno a bah’e na 10%.

Na 2020 gobierno lo sigui cu e maneho aki cu ta faborece e sector comercial. El a bisa cu e aña aki hopi di nan a haci uzo di dje. Te hasta nan a bolbe haya hopi peticion for di comercio pa sigui haci uzo di e facilidad aki.

E otro punto cu -segun Ruiz-Maduro- ta faborece e sector comercial, ta tambe ta e parti di esunnan cu tin un pension priva di nan propio compania. Ta asina cu esunnan cu tin un pension priva ta bay haya un oportunidad pa cumpra esaki na 10%. Segun minister, tur e reglanan rond di esaki a keda publica den landscourant. “Esaki tambe ta algo beneficioso pa comercio di Aruba”, el a bisa.

Despues cu e mandatario a trece dilanti e beneficionan aki pa loke ta trata reduccion di impuesto y te hasta montante di entrada liber di impuesto, el a agrega cu e reforma fiscal cu ta na caminda ‘ta pa nos busca un balans pa nos por yega na un sistema di belasting mas simpel y mas husto’.