ORANJESTAD – Durante un conferencia di prensa cu minister di Finansa, Asuntonan Economico y Cultura, Xiomara Ruiz-Maduro a ofrece ayera na mainta, a duna di conoce e resultado di evaluacion economico y financiero di Aruba di International Monetary Fund.

Di e manera aki, minister Ruiz-Maduro a bisa cu e pais ta den e bon direccion pa haya e credibilidad financiero cu e pais mester. El a splica cu gobierno a percura pa bin cu un plan financiero y economico den cual nan a fiha pa e pais ta na caminda pa recupera e credibilidad financiero.

E plan ta consisti di pone kico ta realisabel pa nos pais, y asina tambe den cual periodo esey lo por bira realidad. Den presupuesto di aña 2018-2019, gobierno a scoge pa un crecemento economico di 1%, di cual nan ta basa e gastonan cu nan ta haci den gobiern,o pero cu tambe a firma pa eInternational Monetary Fund (IMF), caminda cu nan tambe ta premira pa 2,4% di crecemento.

Di otro banda, el a splica cu esey ta mustra cu economia di pais Aruba tin e potencial cu tambe ta bayendo den bon direccion, y esey ta importante, pa motibo cu e ta trece confiansa no solamente local, pero internacionalmente.

Ruiz-Maduro a expresa cu pa e motibo aki, gobierno a bin cu e memorandum financiero economico, y cu Aruba ta haciendo hopi den un aña y mey, y tambe nan a concentra riba e parti pa duna empuhe economico.

Tambe el a sigura cu IMF a haci mencion den e evaluacion riba locual ta e seis sector cu cual Aruba por diversifica su economia. Aña pasa na mei, un experto a bin pa tene sesionnan di informacion cu sector economico, pa saca afo kico ta e caminda cu Aruba por diversifica su economia.

Nan a mira seis sector den cual tin oportunidad, specialmente turismo, economia y tambe e parti di Sistem Faculty na Universidad, e parti di economia di conocemento. Ademas, di parti di agricultura, sector creativo, etc.

Ruiz-Maduro a sigura cu e maneho economico ey ta cla, y tambe lo trece esaki pa comercial y tambe pa Aruba henter, mustrando cu IMF a mira con cu esaki e comerciantenan di Aruba por haci negoshi mas eficiente, y tambe pa baha e costo pa por haci comercio na Aruba mas facil.

Di mesun manera, Ruiz-Maduro a comenta cu den prome parti di evaluacion di IMF bisa cu ‘e actividad economico ta recupera lentamente, y e perspectiva ta positivo generalmente, pero e riesgo ta inclina pa e banda negativo’.

Den e conferencia, Ruiz-Maduro a haci referencia na loke Banco Central a publica recientemente, cual ta e confiansa di e consumidor di Aruba, cu ta subiendo. El a afirma cu e risico tambe ta existi pa loke ta trata e pais bisiña Venezuela, pero Aruba aki tambe a tuma medidanan, den sentido cu e parti di turismo di Venezuela tabata e di dos principal, pero e esfuerso di marketing a wordo haci pa esaki, cu resultado cu mas turista ta biniendo di Merca.

Pa locual ta e parti di refineria, Ruiz-Maduro a bisa cu gobierno no a tuma esaki den consideracion pa e presupuesto, pa motibo cu nan no kier conta riba un entrada cu ta bira dificil, pa via di e situacion geo-politico cu tin na Venezuela den en momentonan aki. El a expresa cu gobierno ta haci su esfuerso pa locual ta e refineria na Aruba por conoce su reapertura.

Riba e tema di e situacion cu e pais bisiña, minister a referi cu esey ta nifica cu e fruta y berdura mester bin for di otro caminda, loke a causa un aumento di prijs pa e productonan. El a agrega cu gobierno a purba di busca alternativa pa habri mercado, y esey hunto cu Reino tabata e mision comercial na Colombia, pa asina habri caminda pa comerciantenan local por haya e productonan necesario, y esey por transforma den prijs mas abou.

Pa via di esey, gobierno a haci e ampliacion di canasta basico di 11 producto te 22 producto, y pa e motibo aki, control tambe ta tuma luga. Ruiz-Maduro a expresa cu ‘gobierno no ta controla tur cos, ni tampoco e prijs di carni, pasobra esey no ta hinca den e canasta basico’. Loke ta hinca den e canasta basico, esey ta lo cual e gobierno ta controla.

Tambe a referi na e moratorio pa supermercado, cuminsando dia 23 di mei, y for di momentonan ey ta existi un ampliacion di moratorio di supermercado. Segun Ruiz-Maduro, gobierno ta trahando pa por baha costo di bida, y p’esey tambe e reforma fiscal ta importante, cual ta bini den fase, y di banda ey, IMF tambe a indica cu ‘e autoridadnan a progresa hopi den e reforma fiscal’.

IMF den su evaluacion a mira e crecemento di locual ta e parti di turista, hopi hende ta scoge pa bin Aruba y den informacion aki ta bin dilanti cu Aruba no ta e pais di mas caro turisticamente den e region, Bahamas ta esun mas caro.