Ayera durante un conferencia di prensa cu Minister di Finansa, Asuntonan Economico y Cultura, Xiomara Ruiz-Maduro a ofrece pa e medionan local, el a trece dilanti loke ta trata impuesto di BBO, pa cual tin dos cambio cu a tuma luga na comienso di aña.
Ruiz-Maduro a bisa cu nan a ofrece nuebe luna pa tur comerciante por haci nan cambio. Tambe a bisa riba e parti aki cu ora a organisa e stakeholders meeting riba reforma fiscal, for di eynan a bin sugerencia di locual ta e parti di mundo comercial, cual gobierno a tene den consideracion.
Di loke ta trata e dos cambio importante, el a referi cu prome, ora e consumidor bay cumpra un producto, e por mira riba recibo ki prijs el a paga y tambe ta menciona BBO, BAVP y BAZV riba e recibo.
Den e reunion cu stakeholders, Ruiz-Maduro a bisa cu nan tin den consideracion loke comerciantenan tambe a trece dilanti y p’esey gobierno a dicidi pa haci un adaptacion necesario, pa banda di consumidor por tin e transparencia necesario. Esey ta nifica cu un cliente ta mira na e reki un prijs y esey ta loke e cliente lo paga na caha; teniendo cuenta locual comercio a trece dilanti, ta permiti e ora ey specifica e prijs riba recibo y cuanto ta paga di BBO, BAZV y AVP.
“Nos ta permiti, despues di 1 di october, pa comerciantenan mustra su cliente cuanto ta paga di BBO”, Ruiz-Maduro a señala.
Cu e cambio aki, Ruiz-Maduro a bisa cu gobierno a tene den consideracion e interes general pa consumidornan tambe por tin e transparencia necesario; y tin na cuenta e parti di comercio pa loke ta trata stakeholders meeting, unda a sigura cu nan kier por specifica impuesto riba factura, pa asina tur hende sa kico ta e componente ora cu nan ta paga belasting.
Di mesun manera, Ruiz-Maduro a declara cu nan a manda un carta ayera pa informa tur gremio cu tabata presente den stakeholders meeting cu gobierno a purba di tene na cuenta tur loke nan a trece dilanti den e reunion, pa yega na un decision balansa den esey cu ta beneficia e consumidor y tambe tene cuenta cu preocupacion cu comercio a expresa.
Ademas, el a bisa cu esaki no ta un manera desconoci, pa motibo cu na Hulanda, Corsou y Colombia tambe ta wordo aplica, ora e persona ta cumpra por wak riba recibo e belasting cu ta paga.
Ruiz-Maduro a comenta cu na Aruba, e cambio aki a wordo haci pa supermercadonan grandi y tambe tin esunnan cu no ta menciona e BBO, BAZV y BAVP riba nan factura, pa motibo cu nan a hinca esey den nan prijs.
“Nada no ta cambia, tur comerciante cu ya caba a haci cambionan – cu nan a hinca impuesto den nan prijs – esey ta keda mesun cos. Locual cu ta bin aworaki ta pa e comerciantenan cu a trece dilanti cu esaki no ta transparente, e ora ey nan por specifica di e prijs kico ta bay pa cada un di e componentenan di impuesto”, Ruiz-Maduro a manifesta.
