Minister di Enseñansa y Deporte, Endy Croes recientemente a duna un resumen di su trabounan di e prome dianan di su maneho riba e tereno di Enseñansa. E Minister saliente a traha riba e PEN 2030 cu ta e Rapport cu tin riba mesa na unda diferente stakeholder a participa pa trece ideanan di e rumbo y direccion cu enseñansa tin cu bay di awo pa 2030.
Minister Croes a expresa cu su maneho di enseñansa lo wordo guia door di e SDG 4 cu ta e compas cu e Ministerio lo uza pa mehora enseñansa y brinda calidad pa nos muchanan y maestronan pa un miho Aruba.
E deseo di e Minister ta pa Enseñansa y Deporte bay di acuerdo cu e plan di maneho di Gabinete Wever-Croes II. Pa esaki mester pa departamento y stakeholders hunto cu e Minister sinta hunto y bin cu e prioridadnan den enseñansa y logra un miho maneho den enseñansa.
“Mi a pidi tur stakeholder cu mi a reuni cu nan, pa duna e top 3 prioridadnan pa infiltra kico ta e puntonan cu tin mas pura y esey cuminsa traha riba esakinan dependiendo di e necesidad di cada punto. Despues lo sigui cada biaha cu 3 top prioridad”, Minister Croes a duna di conoce.
E titular di Enseñansa a duna di conoce cu hopi stakholder a trece dilanti cu tin leynan anticua. Esaki, Minister Croes ta expresa cu e ta sinti cu e punto aki lo sali hopi halto riba e agenda y lo mester bin cu otro comision di experto mara na deadline pa revisa e leynan pa concretisa e retonan.
Tambe e parti financiero y digitalisacion lo mester conoce mehoracion. E rapport di World Economic Forum 2018 ta encera e ‘Future of job 2022 skills outlook’. Minister Croes a remarca cu tin trabounan cu awendia ta existi y tin otro cu mester bay prepara un fundeshi pa nan como tambe prepara nos muchanan pa e trabounan di futuro aki.
“Ministerio di Enseñansa lo ta man yen cu hopi trabou y reunion pa pone un direccion hunto cu e veld di enseñansa y sindicato pa traha na bienestar di enseñansa den su totalidad”, Minister Endy Croes a enfatisa.
