Ayera mainta den un conferencia di prensa den presencia di diferente parlamentarionan, ministernan y raad van toezicht di Lotto pa Deporte, entre otro, minister di Enseñansa y Deporte, Endy Croes a duna di conoce un logro importante pa mundo di deporte, segun el a sigura.

El a informa cu “despues di negociacionnan duro, negociacionnan fuerte pero honesto cu Canadian Bank Note Company, nos a logra rescata e Fundacion Lotto pa Deporte e cual a bira back di pais Aruba”.

El a splica cu e vision di Gabinete Wever-Croes II y di e minister encarga cu Enseñansa y Deporte semper ta cu “deporte y deportistanan mester ta central den cualkier proceso”, cu esaki nan a percura pa negocia y a logra di kibra un contract desfaborabel pa Aruba cu tabata firma te aña 2035.

A renegocia esaki cu Canadian Bank Note Company y den esaki, manera el a expresa, “nos a logra bolter a contract aki na fabor di Aruba na un manera husto”, cu e contract aki lo sigui cu deporte y deportistanan te na final. El a recorda cu na aña 2011 a construi un scenario caminda a firma un contract cu Canadian Bank Note Company y a traspasa e operacion den su totalidad pa Canada den un manera desbentahoso.

For di 1999 Fundacion Lotto pa Deporte tabata bende loteria riba papel, y mesun aña ey a cera contract cu e compania Canades pa asina por digitalisa den un proceso di innovacion. Di 1999 pa 2010 e compania aki su contract tabata indica cu Lotto pa Deporte tabata paga 8.25% di management fee of servicio di tecnologia y e resto ta bay pa premio, comision pa rebendedonan, operacion, y e restante tin cu yega pa deporte.

Desde 2011 a percura y a dicidi pa cambia esaki y a duna na Canadian Bank Note Company e operacion completo, segun Croes a sigura, unda ademas di esey aparte di 8.25% a agrega un extra di 15.25%, loke ta nifica cu for di aña 2011 te cu ayera Canadian Bank Note Company no solamente tabata encarga cu tecnologia, sino tambe tabata opera e Lotto pa Deporte den su totalidad, hayando 23.5%.

“Esaki ta nifica, y a wordo comproba, cu e jaar rekenen di Lotto cu awor nos ta haya, por mira cu envergadura di e deal aki, cu for di 2011 pa 2020 den e contract actual Canadian Bank Note bao e sistema aki a haya 104 miyon cu el a opera cune, y deporte a haya 34 miyon”, Croes a expresa.

Pa e motibo aki, Croes a sigura cu nan a kere cu nan a sinti cu mester negocia cu Canada pa algo mas concreto cu lo sirbi na final di dia pa deporte y pa deportistanan. Den e negociacion cu e ekipo di Canada cu tabata na Aruba nan a yega na negociacion di un contract nobo. A firma un acuerdo cu e puntonan mas importante cu ta bay wordo negocia den proximo 90 dia, unda cu pa fin di october di e aña aki “nos ta bay tin un contract nobo firma cu Canada”.

Di loke nan a logra, Croes a menciona cu nan a logra traspasa back e operacion den su totalidad pa Funsacion Lotto pa Deporte, nan a logra kibra e 23.5% y nan ta bay back na 8.25% unda el a declara cu “esaki ta merece un aplauso grandi”.

Aunke ainda tin hopi trabou pa haci, Croes a expresa cu e parti financiero di Lotto pa Deporte tin su retonan cune, pero e deal aki ta nifica cu tin un luz na final di horizonte y el a sigura cu hasta na 2023 y sigur 2024, comunidad lo cuminsa nota e efectonan di e deal nobo aki.

Den e proceso di formacion di gobierno actual, unda formado a sinta cu diferente stakeholder den cual un di nan tabata Comite Olimpico Arubano e cual su vice-presidente Nicole Hoevertsz a vocifera su preocupacion pa e deal di Lotto unda el a pidi atencion pa wak con nan por a bira e contract ey pa beneficia Aruba y su deporte.

El a sigura cu den añanan dilanti a traves di un maneho concreto cu nan lo bay fiha e fondonan den tur e retonan grandi mester por yega na cada un di e federacionnan pa asina por desaroya e deporte den un miho nivel.

Di esaki, el a trece dilanti cu e negociacion no tabata facil y cu tabata algo imposibel debi cu tabatin un contract firma unda nan a aplica e formula cu Croes semper ta papia di dje cu ta 4D: Deseo, Disciplina, Dedicacion y Determinacion, segun el a sigura.

Di su parti, promer minister Evelyn Wever-Croes a manifesta cu despues cu el a haya e noticia aki a mustra cu un trabou duro di dedicacion y determinacion ta duna su frutonan y cu for di inicio di Gabinete Wever-Croes I nan tabatin retonan den area di deporte unda cu minister encarga na e momento ey Dangui Oduber a lucha duro pa duna luga na deporte cu e merece na Aruba.

“Deporte mester haya su prioridad na Aruba”, el a comenta y a finalisa cu e noticia aki cu a ser anuncia ayera mainta por ta un logro cu lo keda asina tambe y cu nunca mas e lo cambia den desbentaha di deporte.

Nota di redaccion:
 Por recorda cu na mei 2019, Endy Croes a resolve e caso tocante posible actonan ilicito di caracter financiero, relaciona cu un investigacion di Ernst & Young riba directiva di Lotto pa Deporte. Cinco hues di Corte Supremo (Hoge Raad) di Hulanda a ratifica un sentencia anterior di tres hues di Corte Comun di Aruba, Corsou, Sint Maarten y islanan BES na januari 2018, cu a duna Croes rason den su ponencia, esta cu e investigacion di Ernst & Young tabata un acto ilegal contra su persona.

Relaciona cu e caso aki, durante formacion di Gabinete Wever-Croes, parlamentarionan di oposicion a cuestiona e nombramento di Endy Croes como minister encarga cu Deporte, ya cu tabatin un caso cu Lotto pa Deporte. Croes a argumenta cu su caso tabata contra Ernst & Young y no contra Lotto pa Deporte.