Dialuna mainta durante conferencia di prensa Minister di Enseñansa y Deporte, Sr. Endy Croes a presenta y a elabora ariba e solucionnan alcansa pa e algun di e topiconan di mas importancia pa e sector di enseñansa.

E topiconan cu Minister Croes a elabora ariba dje ta e problematica di e studiantenan di EPB cu no por a cuminsa scol, e instructornan di landamento, e problema cu e werksternan di SKOA y tambe Wi-Fi pa Emma School.

Prome cu el a cuminsa elabora, Croes a tuma e oportunidad pa felicita e maestronan cu riba dia 5 di october ta celebra e dia mundial di maestro. “Nos kier felicita di curason tur maestra, maestro, docentenan na Aruba pa cu nan dia. Nos sa cu e ta un bunita profesion y nos sa tambe cu nan ta haci esaki cu hopi pasion. Di parti di gobierno di Aruba, di Ministerio di Enseñansa y Deporte nos kier felicita nan. Pabien y danki di curason pa e bunita trabao cu boso ta eherce pa educa nos muchanan”.

E prome punto cu e minister a toca ta e problematica di EPB. EPB tin 33 mucha cu no por a cuminsa scol e aña escolar aki. 21 di e muchanan aki ta cay bao di EPB Oranjestad y 12 ta cay bao di EPB San Nicolas. E ta splica cu e rason pa cu esaki ta cu tin beleid den e caso aki pa cu overuren. Tin un norma cu ta indica cu e maestronan no por pasa 4% pa cu overuren, pero banda di esey tin e ley di leerplicht tambe.

El a splica cu mesora el a a pidi inspectie pa comunica cu EPB pa busca un solucion. “Manera nos ta bisa, e gobierno aki y e ministerio aki sigur ta pro-solucion, y mesora inspectie a reuni cu EPB y nos a compronde, cu e conseho cu nos a ricibi caba tambe di inspectie ta positivo pa nan por habri dos klas mas”, Minister Croes a bisa.

Segun e minister EPB ta mantene e maneho di e norma di 4% y si habri dos klas mas esaki kiermen cu e maestronan lo surpasa e norma. Mirando e importancia y e leerplicht cu tin y e vision di e minister cu ta pa percura pa brinda un calidad di estudio pa tur mucha, el a pidi e begrotings coordinator pa mira internamente den e propio begroting di e ministerio con por aloca extra placa pa cu esaki, y segun e Minister ta splica, nan ta riba e bon caminda.

“E siman aki nos lo concretisa e solucion pa problema aki, habri e dos klasnan, firma pa por pasa e norma di 4% cu lo bay cay bao di 6% segun calculacionnan preliminar, pero ta nos deber pa percura pa e muchanan aki haya scol y cuminsa scol”, el a agrega.

Otro solucion cu Minister Croes y su Ministerio a logra den corto tempo ta e solucion pa e instructornan di landamento, caminda tabatin hopi desacuerdo entre e minister saliente y e parti aki. El a indica cu desde juli, na final di e aña escolar, e contractnan di e instructornan di landamento cu ta alrededor di 22 persona, a wordo cambia pa un overeenkomst van opdracht (OVO), en bes di un arbeids overeenkomst. Mas cu claro na e momento ey, despues di tanto aña, e instructornan a perde tur e derecho den e siguiente lunanan cu nan tabata cobra por ehempel toelagen cu nan tabata haya conforme nan contract prome.

El a splica cu na principio tabatin deseo pa traspasa e instructornan pa IBISA, e minister a pidi conseho na DRH, un conseho huridico, pero cu un solucion tambe. Conforme un conseho di DRH, cu e minister a hiba ministerraad pa tuma un decision cu ta sostene y wordo carga pa ministerraad den su totalidad.

“A conseha pa laga e instructornan di zwemmen back bao di DPS unda nan tabata, en bes di manda nan pa IBISA. Nos a percura pa tin begroting pa nan y nos a percura tambe di acuerdo cu e mesun conseho, y mi a papia cu directora di DRH tambe pa nos por acelera esaki den october pa e otro payslip nan por cuminsa cobra di acuerdo cu un contract normal cu nan tabata conoce y asina e instructornan di landamento por tin e trankilidad. Un punto berdad ta cu directie onderwijs hunto cu DRH lo sigui sondea bayendo dilanti con otro porta den futuro por drecha esaki na un manera mas miho aun”, el a agrega.

Otro decision cu e minister a tuma den nomber di gobierno, banda di a regla nan contract mester a percura pa tin fondo pa e busnan cu ta busca e muchanan na scol pa por hiba nan na e les y bin back. Esey tambe el a indica cu tabatin su prijs, un suma considerabel y den begroting actual a logra un suma di algo mas cu 300 mil florin pa aloca esaki na transporte.

Un otro tema di hopi importancia ta e werksternan di SKOA. Minister Croes a reuni cu SKOA, SEPPA, SIMAR y diferente otro stakeholders, y den e ministerraad di diabierna ultimo el a haci e peticion preliminario pa pone e idea y e deseo cu e tin, buscando e sosten di ministerraad pa por forma esaki den un manera uniforma, caminda a bay di acuerdo pa forma un comision.

Den e comision aki nos lo tin un representante di financien, un representante di DWEZ, pa e parti legal, un representante di DRH, un representante apunta pa SKOA y tambe un representante di CAD, como cu ya caba nan a haci diferente trabao ariba esaki y nan ta conoci cu esaki, y banda di esey e Ministerio di Enseñansa lo apunta maximo 2 experto.

“Mi lo bay ministerraad cu e peticion oficial pa nos por haci e comision aki oficial den un ministerraad besluit (MB) y di eynan duna e comision, den mi perspectiva alrededor di 30 dia pa nan bin cu e solucion structural, sostenibel y concreto. Esey ta e deseo cu nos tin y manera nos ta bisa nos ta traha pa soluciona y no pa bringa cu cada departamento tanten cu por, di acuerdo cu ley, di acuerdo cu e placa cu tin ariba e mesa”, Croes a indica.

El a sigui splica cu SKOA tin 2 problema pa cu e werksternan, un di nan ta cu un tempo atras a sigui paga e werksternan, financien tabata duna SKOA un suma pa e premiesnan cu SKOA mester drag af tur luna, e parti ey e minister saliente, di acuerdo cu e manera di paga, a stop esaki. E werksternan a sigui cobra mientras cu SKOA no tabata haya e placa pa por a drag af e placa ey, y aworaki door di un cantidad di luna e suma ey ta riba 5 miyon florin.

E di dos problema cu el a splica ta cu berdaderamente, e manera cu pa ley ta bisa, mester paga e werksternan via explotatie, di un otro manera cu no ta cay bao di personeel. Segun el a splica tin un MB di ex-minister Winklaar na 2015 cu a sugeri pa paga e werksternan di otro manera, pero e comision lo mester bin cu un solucion pa esey tambe. “Mi deseo ta pa soluciona e problema aki pa e werkster por ta trankil, SKOA por ta trankil, gobierno por ta trankil y mas cu claro den cuadro di ley”, el a expresa.

Por ultimo el a indica cu el a encontra den diferente documentonan cantidad di peticionnan y un di nan, cu el a mira como un prioridad, tabata service Wi-Fi pa Emma School. El a splica cu e no a reuni cu Emma School ainda, “pero di curason nos a mira di biaha cu ta cosnan cu ta necesidad awendia tambe y primordialmente pa un scol manera Emma School nos tin cu duna nos apoyo na e muchanan aki. Mesora a aproba un suma pa Setar pone Wi-Fi back na Emma School. Ya caba nos a firma esey y e ta canando su caminda y pronto Emma School lo tin su Wi-Fi back”.