Pa documenta atrabes di curiculo historia di Status Aparte, pa introduci esaki na scolnan preparatorio, basico y secundario.
Diahuebs ultimo Minister Endy Croes a reuni cu directora di Departamento di Enseñansa Aruba, sra. Anne-Marie Proveyer – Groot, sra. Gracy Garcia- Dijkhoff y sra. Carola Peeters cu ta encarga cu desaroyo di curiculo cu e meta pa percura pa material educativo cu ta tene cuenta cu e mucha cu ta biba na Aruba.
E reunion a bay den un bon atmosfera unda e Mandatario a haya mas informacion di con e departamento ta hinca den otro. Tambe presente den e reunion tabata sr. Manolo Giel cu ta trahando riba e historia oficial di Status Aparte.
E deseo di Minister Endy Croes ta pa e historia di Status Aparte ser documenta atrabes di un curiculo cu ta wordo controla y aproba pa Departamento di Enseñansa pa asina por drenta den e scolnan tanto preparatorio, basico y secundario. Den scol preparatorio y basico ta pa e alumnonan conoce e historia di Status Aparte y den scol secundario e ta un materia.
Den e reunion a keda palabra cu sr. Manolo Giel lo representa Minister di Enseñansa den e proyecto aki y lo tin contacto directo cu Departamento di Enseñansa unda nan lo traha riba (1) e tema den e module pa e scolnan preparatorio y basico. (2) Tambe via un metodo bahul cu ta conoci na MAVO.
E comision ta sigui traha riba e proyecto aki cu ohala pa augustus 2022 por wordo realisa.
