Durante un sesion informativo, siman pasa minister di Enseñansa, Ciencia y Desaroyo Sostenibel, Armando Rudy Lampe a duna di conoce cu no tur scol por a habri dia 3 di september ultimo y cu mayoria di maestronan a cuminsa adapta pa e cambio na enseñansa digital.

Manera a keda conoci, tin scolnan cu a habri na 100%, otro cu a habri cu 50% di e capacidad y otronan cu no a habri pa algun of otro motibo. Por ehemplo, tin tres scol cu a keda cera pa motibo cu algun di e maestronan a sali positivo pa e prueba di Covid-19 y p’esey a tuma e precaucion di laga scolnan ey cera y asina proteha e salud di e muchanan.

Lampe a trece dilanti cu tin hopi stress den comunidad y principalmente entre mayornan pa wak si nan yiu ta sigur of no pa bay scol na e momentonan aki, cu tin aumento di casonan di Covid-19. El a bisa cu “e no ta un situacion facil cu nos ta habri e aña escolar aki bou e condicionnan aki”.

Ademas el a anuncia cu scolnan a habri y a implementa nan mesun protocol pa sigui cu e reglanan di bio-siguridad di Departamento di Salud Publico, pa cuida e salud di muchanan y maestronan. Den e sesion informativo a aclaria cierto puntonan di mayornan pa locual ta trata e uso di tapaboca di e alumno, cu henter dia tin cu bisti na scol. Nan ta pensa cu esaki no ta den e bienestar di salud di nan yiu, cu por trece un impacto negativo. Tocante esaki Lampe a specifica cu e no ta un experto di salud, pero locual el a sigui na nivel internacional di comunidad y expertonan di salud, ta cu tampoco tin consenso; den esey tin diferencia di opinion.

El a continua splica cu ta existi algun linea di pensamento cu tin mas aprobacion. Esey ta cu muchanan riba 12 aña, ta miho pa mantene distancia social y tambe pa usa tapaboca. E diferencia di opinion ta mas concentra riba esunnan mas chikito, cu ta mas dificil pa nan practica e distanciamento social, pa motibo cu nan ta core rond y hunga, algo cu ta forma parti di nan desaroyo. Ademas di e casonan di contagio, tin cu aplica e reglanan di protocol pa hobennan, pero no pa muchanan mas chikito.

Ademas, Lampe a referi na un carta publica recientemente, tocante pensionadonan cu ta eherciendo un funcion den sistema di educacion, relaciona cu pago di salario y cierto ora cu mester cumpli pa duna les. El a referi na un carta cu Sindicato di Maestro (SIMAR) a manda como contesta tocante pensionado den enseñansa. Lampe a splica cu e grupo di pensionado ta un grupo den riesgo. “Pa nan mesun salud, ta miho pa nan no bay para dilanti klas sino keda cas.”

Ademas el a indica cu e grupo aki tin entrada, cu nan por biba cu nan pension, y a cuestiona pakico nan lo kier pone nan salud den riesgo. El a señala cu sindicato mester motiva pensionadonan pa cuida nan salud.

Otro topico cu a trece dilanti den esaki ta cu ta existi ‘Bermudez Norm’ cu a bin for di gobierno anterior, pero esey no a wordo aplica na e momento ey. Y aworaki cu e pais ta den un situacion financiero hopi dificil, ta un momento apropia pa aplica e norma aki.

Di mesun forma, Lampe a comenta cu si tin pensionadonan cu no kier acepta esaki pa traha full time y ricibi 25% di salario so, gobierno tin e posibilidad pa nan traha un maximo di 10 ora pa siman. Esaki ta conta principalmente pa enseñansa secundario.

“Ami ta kere cu loke nos a propone den crisis aki e ta rasonabel”, Lampe a sigura.

Di otro banda, na e momentonan aki cu tecnologia ta avansa y ta wordo aplica pa enseñansa, tambe tin cierto maestronan cu no ta adapta totalmente pa e cambio aki. Lampe a expresa cu ta necesario pa e maestronan cu ta resisti na e cambio aki haya capacitacion, pa motibo cu e ta kere cu ora nan ta wak cu digitalisacion di enseñansa ta bay haci nan bida mas facil, e ora ey nan por keda convenci cu esey ta e manera pa bay.

“Muchanan cu ta nace den era aki ta nace den era digital”, cu mas informacion y desaroyo rond di mundo y nan tin un otro mentalidad, cu ta haci cu no por sigui duna les manera antes.

Pa loke ta trata e otro grupo cu a adapta caba, Lampe a pone como ehemplo Colegio San Nicolas, cu a haya dos dia di training y e comentarionan di maestronan tabata positivo riba digitalisacion. “Nos scolnan virtual, cu ya a cuminsa, tin maestronan cu ta comprometi cu un sistema di innovacion completamente nobo” el a manifesta.