Minister di Enseñansa ta reacciona riba informacion circulando acerca di schoolgeld: “Nos ta den contacto estrecho cu SKOA pa yega na un areglo final”

Minister Endy Croes a tuma nota di e noticia cu ta circulando rond di aumento drastico di schoolgeld di scolnan di SKOA. E Mandatario a expresa di kier trece un poco trankilidad. Tin un caso andando di e werksters di SKOA pa basta tempo caba y 2020 esaki a bira un poco mas grandi.

“Na momento cu mi a tuma e cartera di Enseñansa dia 20 di september 2021 mi a pidi poco tempo y comprension pa nos atende cu e cuestion aki”, Croes a indica den un comunicado di prensa. “A forma un comision di diferente profesionalnan pa studia e caso. Dos siman pasa e directiva completo di SKOA a haya presentacion di e rapport final. Diabierna ultimo Conseho di Minister tambe a haya presentacion di e rapport aki cu diesdos diferente punto di accion cu por corigi esaki paso nos ta buscando solucion.

“Den cuadro di esaki SKOA lo a publica cu e aña escolar nobo nan lo bay aumenta e schoolgeld di AFL. 175 pa Afl. 585 y pa MAVO te Afl. 685. Minister Endy Croes a bisa: nos ta laga esaki habri pasobra e ‘stichting’ tin tur autoridad pa tuma su decision como ‘stichting’. Mi kier a subraya cu Gobierno di Aruba e unico autoridad cu nos tin ta pa cumpli cu ley y duna e ‘stichting’ como directivanan di scol placa pa nan por garantisa cu nos muchanan por wordo educa. Gobierno tampoco Minister no por mete den un ‘stichting’, pero si nos ta habri pa sinta na mesa cu nan pa resolve cualkier inkietud y pa trece solucion. E Mandatario a expresa cu e no ta apoya e aumento di prijs aki. Nos a compronde cu a wordo bisa cu ta un intencion. Nos ta den contacto estrecho cu SKOA pa yega na un areglo final pa esaki, ohala ainda por tuma luga den luna di maart pa cu e werksters di SKOA cu lo desemboca tambe como solucion alternativo pa cu e aumento di schoolgeld cu ta preocupa henter comunidad.

E Mandatario a sigui bisa: “Mi kier pidi comunidad pa keda trankilo, nos ta buscando e solucionnan necesario di acuerdo cu ley p’e problema di SKOA werksters. Ta bon pa informa comunidad cu bao di Gobierno nos tin e scolnan publico esta DPS cu no lo conoce aumento di schoolgeld. Nos lo keda na mesa y sondea tur posibilidad pa resolve e aspecto di SKOA werksters y consecuentemente elimina e aumento di schoolgeld p’e proximo aña escolar”, e Mandatario a finalisa.