Minister di Enseñansa, Michelle Hooyboer-Winklaar a comenta cu lo bay tuma luga un restructuracion di salario pa loke ta docentenan. E proceso aki actualmente ta canando cu tur e diferente partnernan, entre otro sindicato Simar, diferente departamento, diferente directivanan di scol, pa tur hende ta envolvi y pa esaki wordo introduci tambe sin problema. Cu tur hende sa precies kico ta spera di nan y cu esaki bay sigur sin cualkier conmocion, cualkier cambio drastico cu mester tuma luga, cu e ta bin sin sorpresa.
E ta sigui splica cu e proceso aki ta canando manera mester ta y ta refleha tambe riba e parti eynan di cambionan di salario, den e presupuesto aki pasobra a premira cu trabaonan lo keda cla pa pe prome fase, den Augustus 2016 y esey ta e meta.
Ta canando e proceso eynan hunto cu tur partner, pa keda cla pa introduci esaki unda sigur un di e beneficionan mas cu a spera pa nos maestronan ta, cu nan no mester ta para dilanti un klas pa 20 aña largo sin por a bay dilanti.
Wardando pa basta tempo
E proceso aki ta algo cu pa hopi aña tabata wardando riba dje. Tin hende tabata referi na dje na e posicion huridico di e maestronan cu mester a wordo drecha. A cuminsa cu e proceso ki mas cu dos aña pasa. Actualmente e sistema unda ta evalua, ta pone nan den cierto schaal di salario cu ta yega na un blafon y no ta sali for di dje. Tin docentenan pa 30 aña ta trahando dilanti klas, cu e mesun salario. Kier pa tin un mehoracion di calidad pa nos maestronan, pa nan por sigui studia y crece den nan trabao, pasobra e ta sano. Tin un proceso cu ta tumando luga cu diferente partner, entre nan sindicato Simar, diferente directiva di scol, pa introduci prome fase di restructuracion di salario cu lo keda cla pa Augustus 2016.
Beneficio pa studiante y maestro
Esaki no ta algo cu solamente lo beneficia nos maestronan, pero studiantenan tambe, si por tin un cupo di cuerpo di nos maestronan cu ta motiva, cu por motiva nos studiantenan tambe y hopi tin di haber cu con ta paga nan. Eynan ta unda full e proceso ta canando su caminda y ta hopi contento cu e ta progresando manera cu ta spera, e mandatario a comenta.
