Ayera, minister di Enseñansa, Endy Croes a duna un presentacion virtual den cual a duna un splicacion amplio riba e plan di maneho pa su ministerio. Durante e conferencia, el a indica su intencion pa haci un debate nacional riba e asunto di idioma di instruccion.
Bon Dia Aruba a puntra Croes con e ta mira cu e maneho di idioma di instruccion mester bay? Idioma ta un di e retonan, dominio no solamente di Hulandes. “Esaki ta un di e cuatro prioridadnan cu nos tin den e Maneho 2021-2025. Den 2022 lo kier tuma e decision cardinal riba esaki”, el a contesta. El a bisa cu a duna hopi enfasis na e maneho di idioma, cu tambe ta un punto importante den e tussenrapport. “Esaki mi kier haci un debate nacional.”
El a splica cu esaki ta e motibo cu nan a forma e plataforma number uno, unda tur e schoolbestuurnan lo haya nan participacion. Ademas tin expertonan di Inspectie Onderwijs, Directie Onderwijs, DRH, ‘tur cu por duna un of otro aporte riba e nivel di profesionalismo, nos lo haci esaki un debate, pa hunto nos tuma e miho decision’, Croes a declara.
