Minister di Enseñansa y Deporte Endy Croes a tene na Arubahuis un encuentro cu studiantenan y mentornan. Tambe presente na e ocacion aki tabata Minister Plenipotenciario Guillfred Besaril, Anne Marie Proveyer-Groot, directora di Departamento di Enseñansa, Viola Huetger, rector di Universidad di Aruba y un grupo di mentor.
Minister Croes a habri e encuentro bisando cu e lo tene un introduccion cortico, pasobra meta di e encuentro aki ta pa e como mandatario tende di e studiantenan kico ta nan problema of preocupacion. Durante di e encuentro diferente tema a bin padilanti, manera e deseo pa regresa Aruba y e debe na DUO cu ta den euro. Algun studiante a duna di conoce cu nan lo keda un periodo Hulanda pa traha pa gana experencia y tambe cuminsa na paga nan fiansa na DUO bek.
Un aspecto hopi importante cu a bin dilanti ta e laso cu e studiante tin cu Aruba y kico ta e maneranan pa keda stimula esaki. Tambe a papia cu lo mester enfoca mas riba tipo di estudionan cu por duna mas garantia pa un trabao na Aruba. Riba e punto aki a papia tambe pa bin cu un sistema cu e studiante por tin un bista riba e vacaturanan cu tin na Aruba y cu esaki por stimula nan na dicidi pa regresa y traha na Aruba.
E encuentro tabata hopi informativo y ameno y minister Endy Croes a gradici e studiantenan pa a tuma e tempo pa bin Arubahuis pa asina ela haya un chens pa papia cu nan y tende nan preocupacion.
Ademas di e reunion cu e studiantenan, e Minister di Enseñansa y Deporte a tene un reunion cu e mentornan. Cuater mentor di e grupo di 8 mentor por a asisti na e reunion cu minister. Esakinan tabata Swinda Venhorst-Thijsen, Lourdes Bramble-Tromp, Yuraima Henriquez-Rodulfo y Donna van Heukelem-Kock.
E mentornan na prome lugar a bisa di ta contento cu e oportunidad aki pa reuni cu e minister. Despues di a introduci nan mes, tabata tin un presentacion PowerPoint pa minister Endy Croes. Den e presentacion e mentornan a elabora riba nan trabao. E mentor ta guia e studiantenan den nan prome aña di estudio. Nan ta haci esaki na un manera hopi accesibel, nan ta hopi enbolbi cu e studiante y mester tin un base di confiansa cu otro. Tambe e guia ta pa e studiante bira mas independiante y siña manera nan pa yuda su mes.
Un parti grandi di e trabao di e mentor, banda di guia e studiante, ta e preparacionnan pa e grupo nobo di studiante cu ta bin Hulanda. Ta busca contacto cu e studiante cu a indica di kier bin Hulanda y tambe contacto cu e mayornan. Ta traha riba e formacion di e POC, cu ta e Plaatselijke Opvang Commissie y ta reuni riba e programa pa “opvang” di e studiantenan. Den e proceso aki tin hopi contacto cu Arubahuis y otro instancianan manera gemeente, banco y instancianan di vivienda pa studiante.
E mentornan a duna un relato riba con e proceso ta bai na momento cu e studiantenan yega Hulanda y kico asina e mentor conhunto cu e POC ta regla pa e studiantenan, manera nan inscripcion na gemeente, habri nan cuenta di banco y yuda nan drecha nan camber. Un aspecto segun e mentornan ta hopi importante durante di e programa di opvang ta actividadnan social, manera come hunto, bai wak un pelicula of bai bowling. Esaki ta haci cu e grupo ta cera un laso cu otro cu por ta di importancia durante di nan periodo di estudio.
Durante e prome aña di guia e mentor ta tene contacto y ta bishita e studiante pa tende con ta bayendo cu su estudio y su bida na Hulanda. Tambe e mentor ta informa e studiante via Whatsapp of email riba desaroyo y temanan cu ta relevante pa nan estudio y nan persona.
Minister Endy Croes a gradici e mentornan pa e informacion y a bisa cu lo ta bon pa e por reuni cu e mentornan riba un base structural – kisas via zoom – pa asina tambe pensa y papia riba puntonan di atencion pa mehora e guia na nos studiantenan cu ta un parti importante di su maneho como minister di Enseñansa.
