“E ta pa mi, como Minister Demisionario di Enseñansa, hopi duro pa reconoce e realidad, esta cu mi for di principio di mi no a haya sosten di mi coleganan den coalicion,” ta locual Armando ‘Rudy’ Lampe di RED Democratico a bisa Bon Dia Aruba.

E Minister di Enseñansa Demisionario a haya su mes ta admiti algo cu pa hopi tempo e tabata purba wanta keto. Cu for di prome momento caba, su propio coleganan di coalicion tabata haci tur cos pa pon’e faya den su maneho.

“E momento cu mi a bay Parlamento, den e prome lunanan, pa presenta e plan di independisacion di DPS, el a wordo para door di mi mesun miembronan di coalicion. Tabata Ricardo Croes so cu a sostene e plan ey. Y awor despues di varios aña ta wak cu tabata un decision robes di Parlamento. Pasobra e decision aki a stroba e propio maestronan.”

E hecho cu no a permiti e Minister kita e autoridad di DPS for di e Ministerio di Enseñansa sino pone esaki den man di un organo independiente, a crea un retraso den progreso di derecho di docentenan. “E no ta funciona manera mester ta. Un Minister cu tin dos pechi bisti no ta algo cu mester ta existi. Pasobra DPS tin hopi retraso pa personal di maestronan y no ta funciona manera debe ser. Na final ta e politico mester bin aden y realmente ta un profesional mester dirigi.”

Palabracion di Coalicion

Rudy Lampe ta lamenta cu ningun di e puntonan crucial di RED Democratico a haya sosten di coalicion. “Nos puntonan di decriminalisacion di cannabis, cannabis medicinal, e no a pasa Parlamento tampoco. Nos di RED Democratico a cumpli cu e programa di gobernacion. Es mas, tabata e propio Gabinete Wever Croes cu a stipula 61 punto pa enseñansa, y nos a cumpli cu tur. Pero e otro partnernan no a cumpli cu nos.”

Coalicion ta keda solucion pa Aruba

A pesar di e mal experiencia aki, Rudy Lampe ta kere si cu pa Aruba, e miho sistema ta un coalicion y no un solo partido cu ta haya mandato completo. “Nos a cumpli cu nos palabra. Nos no a tumba Gobierno y nos ta kere cu un Gobierno absoluto di un solo partido ta un desaster.”

Pero e pregunta ta con miembronan ‘chikito’ den un coalicion por tin un stem fuerte. “Nos a siña nos les. Awor aki nos a pasa den e experiencia aki. Awor nos ta bay para mas fuerte, y bisa cu mester cumpli cu acuerdo di Gobernacion, sino, no tin Gobierno.”

Lampe a sigui splica cu RED a splica comunidad cu memey di un crisis di COVID-19, no tabata prudente pa a laga un Gobierno cay. P’esey a keda sostene e coalicion te na final. “Aunke cu nan no a cumpli cu nos.”

Di otro banda, Rudy Lampe ta sinti su mes hopi orguyoso di e lista di RED Democratico. Particularmente pasobra ningun mester a bringa pa number. E idealismo aki a keda bibo den e partido. “Bo ta drenta politico pa motibo cu bo kier sirbi bo pais.”