Durante un conferencia di prensa cu Minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece ayera, el a duna di conoce na comunidad e maneho nobo di Scholing Op Een Andere Locatie cu ta nifica ‘Educacion na otro localidad’.
Ta asina cu ta existi e ley di enseñansa obligatorio y interpretacion di e ley aki ta enfatisa riba e hecho cu un mucha studiante tin derecho riba educacion. Pa e motibo aki, Lampe a anuncia cu educacion di mucha no necesariamente ta keda realisa fisicamente riba e muraya di scol tradicional.
Lampe a anuncia cu por cumpli cu e derecho di mucha riba educacion sin pensa riba scol fisico tradicional solamente. El a bisa cu ta autorisa diferente experiencia di educacion cu ta tumando luga pafo di e muraya di scol tradicional.
Esaki, Minister di Enseñansa a comenta cu tin di haber cu nan plan di Educacion Nacional 2030, den cual ta papia di esunnan cu ta studia bou guia di un leerende, digital leeromgeving cu ta ambiente di aprendisahe digital y pa motibo ey, minister a cuminsa cu autorisacion di Home Schooling. Esey ta nifica, cu un mayor cu a dicidi cu su yiu, pa un motibo hustifica, ta miho pa e tin Home Schooling, esey no ta viola nos ley di enseñansa obligatorio, ya cu e no mester ta fisicamente den un scol.
Di mesun manera, Lampe a specifica cu ta existi caso cu muchanan cu ta inscribi na un centro educativo cu un maestro y nan no ta fit den scol tradicional. Por ehempel muchanan cu ta cay den spectrum di autismo y cu no por funciona den un klas tradicional, y pa e motibo aki ta existi un centro educativo specialisa pa nan.
Ademas, Lampe a sigura cu tin muchanan cu ta atendiendo ‘virtual schooling’, cu na Aruba ta un centro educativo cu ta ofrece e servicio y nan tin un maestro cu ta uza un programa pa e maestro por bira un avatar, y duna educacion remoto.
Lampe a duna di conoce cu nan tin un fundacion cu a presenta un iniciativa nobo pa e muchanan cu ta inscribi na scol tradicional. Por ehempel e mucha ta alumno di Colegio San Nicolas, pero e no ta bay na e colegio ey; awo nan ta zorg pa otro localidad y nan ta ricibi tur e material educativo, coaching di maestro, pero nan no ta fisicamente den scol, nan ta haya guia na otro localidad.
Otro nivel di e maneho aki, Lampe a finalisa bisando cu ta implica cu otro casonan distinto, entre nan, varios menor di edad cu ta cera den KIA y a base di e maneho aki a pone docentenan disponibel pa duna les, dunando educacion pa nan y segun Lampe mes a bisa, ‘e resultado ta tremendo’.
